【安全加辣】授權寫清寫楚 Apple私隱保護再提升
Apple 嘅年度大會 WWDC 剛啱舉行完，上年推出嘅「Sign in with Apple」功能，俾用戶開帳戶時隱藏真正嘅 Apple ID ，叫好叫座，至今錄得兩億次使用。今年 Apple 繼續提升 iOS 及 macOS 用戶嘅私隱保護，以減輕廣告商追蹤用戶嘅行為，一齊睇吓有邊幾方面？
透明採集
Apple 規定，app 開發商將要清楚顯示將會採集嘅資料細節，同時要喺 app store 頁面列明會用啲乜嘢資料喺網上追蹤用戶嘅數碼足跡，否則就唔可以上架。而且唔單只係 iOS app 要咁做，macOS 亦同時實行，咁就可以俾用戶喺安裝前睇清睇楚會採集邊啲數據，再決定用唔用啦。另外，如果 app 本身同其他 app 或網站有合作，可以利用佢哋嚟進行追蹤，就要額外攞多個授權，呢一點對阻截廣告推送雖然好有效，不過都要睇用戶對安裝指定 app 嘅決心，特別係如果隻 app 大熱，不可不裝的話⋯⋯
定位選擇
某啲 app 例如交友 app 喺安裝時，通常要求用戶授權使用定位功能，否則就無法安裝。但如果用戶想識朋友，有時唯有焗俾。不過，Apple 今年稍後將會提供「proxy location」選項，俾用戶授權俾呢啲 app 用，咁就唔使俾個 app 掌握用戶嘅衞星定位位置，減低風險。
亮燈易識
如果大家喺安裝新 app 時有認真睇吓，可能會發現好多 app 都會要求授權錄影或收音權限，但用 app 時到底幾時運作緊呢？又唔係咁多人知。Apple 就加入新功能，強制 app 開發者喺啟用呢兩項功能時，要喺狀態欄著橙燈顯示，咁就唔怕暗中被偷睇同偷聽啦。
至於 Apple 自家嘅 Mac 版本瀏覽器 Safari，亦加入 Privacy 按掣，功能同 Chrome、Firefox 或 Edge 現時提供嘅服務一樣，一按即知有啲乜嘢組織嘗試追蹤緊你嘅瀏覽行為，同時顯示攔截咗邊啲追蹤，成功「追落後」。
相關文章：【又出事】iOS用家注意 Facebook暗中偷開相機
