【找數真漢子】Ubisoft重整R6S公平性 兩招剷除非法玩家
唔少人都鍾情玩連線遊戲，特別係電腦或家庭遊戲機嘅玩家，真係好專注咁玩，個個都想喺遊戲排行榜上佔一席位。有啲人可能係為咗攞威，亦有玩家想幫所屬隊伍響朶，有咗呢啲目標，自然就有人走偏門！除咗用 cheats，原來連 DDoS 分散式阻斷服務攻擊都係其中一個絕招嚟！遊戲開發商 Ubisoft 為咗對付呢啲玩家，喺 9 月曾公開表示會大力打擊，而且佢唔係吹下水就算，近來真係出招找數，然後宣布成功減少 DDoS 攻擊達 93%，到底係乜招數呢？
打機用 cheat，我諗唔少人都試過，特別係好似小編呢啲弱弱玩家，有時唔用 cheat 真係過唔到版。不過，以前打機純粹係為咗爆機，但自從遊戲連線後，用 cheat 就令遊戲變得唔公平，尤其係有啲 online game 會獎賞排行榜上嘅玩家或團體添。Ubisoft 家傳戶曉嘅第一身射擊遊戲《Rainbox Six Siege（R6S）》，亦係其中一款被高度關注嘅遊戲，除咗網上有售出 cheat 程式，有玩家亦發現透過攻擊競爭對手所在嘅伺服器，可令對手出現延時甚至強制彈出遊戲，成功攞到遊戲分數，於是就透過 DDoS-as-a-Service 服務，出錢攻擊對手所在嘅 Ubisoft 伺服器。
Ubisoft 對呢啲 DDoS 大為頭痛，因為搞到好多玩家無法連線，大量流失玩家。為咗對付呢啲攻擊，Ubisoft 唔單只提升自己嘅防禦力及伺服器基建，仲追蹤提供 DDoS 攻擊嘅服務供應商，成為業界首個向呢類供應商提出起訴嘅案例。提出起訴後，Ubisoft 剛公布上月嘅 DDoS 攻擊量已大為減少 93%，相信絕大部分玩家都可以重新正常打機。
一不做二不休，Ubisoft 除咗解決 DDoS 攻擊之外，為咗改善連線遊戲嘅生態，亦控告埋提供改 game 服務嘅人，其中曾接受 BBC 訪問、聲稱每月有兩千美元收入嘅改 game 軟件達人 JVL，亦正面臨 Ubisoft 嘅起訴。不過，告 cheater 嘅案例就多喇，好似 Microsoft、Rockstar Game、EpicGames 都起訴非法售賣改 game 軟件嘅組織，而且結果都係勝訴。其實用 cheat 真係唔值得鼓勵，特別係遊戲軟件開發商會嚴打呢啲玩家，贏咗場 game，輸咗個 account，真係值得咩？
