【十國警方聯手】成功剷除遙距間諜程式
打擊跨國犯罪集團，每次都要動用好多警力，甚至要幾個國家嘅警方一齊合作先搞得掂。咁如果要打撃嘅，係跨國網絡犯罪集團呢？原來仲誇張！最近就發生咗一宗類似個案，結果要十個國家嘅警察聯手，先捉得晒所有嫌疑犯。
講緊嘅係 Imminent 呢個非法網站，佢哋其實明目張膽做咗好耐生意，最平25蚊美金就可以買走佢個遙距間諜程式。程式有乜用？就係可以透過一啲作業系統嘅漏洞發動入侵，用嚟熄咗目標對象部電腦嘅防毒程式，然後任意監控對方個咪同埋鏡頭，記錄晒電腦入面所有活動，抄低所有網上銀行嘅登入資料，再利用受害電腦感染其他電腦。最致命嘅係程式簡單易用，完全唔使任何黑客技術，俾錢買完就用得，認真 user-friendly。買家來自全球 124 個國家，總共有萬幾人俾過錢買程式，粗略估計，加埋有幾十萬人因為 Imminent 程式而受害。
歐洲刑警組織 Europol 終於睇唔過眼，今年年初開始部署行動，首先喺 6 月聯同澳洲、比利時兩地警方，突擊拉咗程式開發者同埋 Imminent 其中一個員工，然後再分別聯絡哥倫比亞、捷克、荷蘭、波蘭、西班牙、瑞典同埋英國等地嘅警方，陸陸續續再拘捕多 13 人，成功瓦解整個集團，唔單只令 Imminent 網站停止運作，仲扣押咗 430 部裝置，摧毀埋集團嘅基礎設施，令到程式唔能夠再運作，名副其實係將集團連根拔起。
歐洲網絡罪案中心主管 Steven Wilson 就話，其實俾 25 蚊美金，就可以睇晒目標對象嘅私隱，係一件好恐怖嘅事，所以佢哋同各地警方會出盡力打擊呢類犯罪份子，但係都要提醒用戶，記得記得記得，定期更新電腦系統同埋防毒程式，唔好俾罪犯有機可乘。
