【年少無知】恫嚇攻擊三億iCloud帳戶終判刑

睇得《賭神》電影多，都知道玩show hand 時乜嘢係偷雞，只要有信心扮鎮定，用堅定語氣同埋眼神講到對家相信自己拎住大牌就得……當然呢個只係電影中嘅情節，現實中要真係偷雞，就唔係咁易嘅，特別係要識揀對手添。

講緊係呢位22歲 Kerem Albayrak，佢自稱係Turkish Crime Family 黑客組織嘅成員，2017 年 3 月寫咗封信俾 Apple，話自己成功盜取咗3億個 iCloud 戶口，恫嚇 Apple 喺 4 月 7 號之前，交出 75000 美元加密貨幣，或者 100000 美元 iTunes 禮物卡，否則就會將手頭上嘅 iCloud 戶口還原做原廠設定，同埋遙距刪走受害人 iPhone 嘅所有資料。

遇着普通人可能會驚嘅，但 Apple 可能對 iCloud 嘅保安信心十足，由頭到尾都未驚過，收到勒索之後，即時向有關部門報警，未到交贖款限期，3 月 28 日英國警方已經拉咗 Kerem Albayrak！成件事最搞笑嘅，係後來證實佢原來由始到終都冇黑入過任何 iCloud 戶口，真係「賭白頭片」，佢亦喺法庭上面乖乖認罪，今個星期法庭終於有判決，判 Kerem Albayrak 緩刑兩年，兼且 300 小時社會服務令，同埋 6 個月電子宵禁令，今次真係偷雞唔到蝕渣米！

不過，暗網上真係有黑入 iCloud 戶口嘅服務，可以讀取受害人戶口內嘅備份內容，最平嘅月費更只需 15 美元，真係非常抵玩。網絡安全專家就話要達成入侵，必須滿足三個條件，首先係要知道受害人戶口登入名稱同密碼，其次係受害人無開啟 two factor authenication 驗證，最後一點最重要，就係受害人有設定到會備份資料上 iCloud，否則就算入到去都無嘢好偷。如果想防止自己嘅戶口俾人入侵，相信最應該要做嘅係設定 2FA 登入啦。

資料來源：https://bit.ly/364bhpG、https://bit.ly/2PRTnkI