【星戰終章】詐騙案的崛起！
萬眾期待嘅《Star Wars》終章 The Rise of Skywalker 已經上映，相信好多人都迫不及待想入場睇，但撲飛亦唔容易，而且依然有大量人慣咗上網有盜版睇。有咁大需求，黑客又點會放過呢啲機會呢？防毒軟件供應商 Kaspersky 最近就發表報告，指出針對《星戰9》嘅惡意攻擊開始暴升，黑客唔單只會用假網站扮正牌，以假亂真呃星戰迷登記做會員，更會用「搶鮮版」電影引粉絲下載嚟睇，星戰迷要小心防避喇！
其實利用受歡迎嘅電影作為魚餌，引誘網民上檔，已經唔係乜哩石破天驚嘅攻擊手法，甚至可以話係過晒時嘅招數，好似之前哈利波波或權力遊戲新一集推出前，都一定有呢啲攻擊，但唔知點解咁低級嘅手法點都玩唔爛，仲係有人中招。喺今次 Kaspersky 公布嘅調查結果上，就至少有 30 個以上網站及社交平台帳戶，利用星戰迷焦急嘅心情，話會免費喺新作上映前俾網民睇，但就必須先輸入信用卡資料，話免費但又收卡，極度唔 make sense 但都有人上檔喎。另外，Kaspersky 話截至報告發表前，至少有 83 個網民，由整到極度逼真嘅假官網，下載咗 65 個冒充電影檔嘅惡意檔案落嚟，今次真係貪出禍喇。而整體嚟計，Kaspersky 就話 2019 年有關星戰嘅攻擊多達 285,103宗，受病毒感染人士多達 37,772 個，比起 2018 年上升一成。
至於應該點防避呢？其實真係講咗好多次，首先唔好下載或企圖搵盜版電影嚟睇，因為十成十都會隱藏病毒或係釣魚連結，其次就係唔好因為有新情報或優惠而 click 連結睇，想知道電影消息，都係手動輸入返星戰官網網址 https://www.starwars.com/ 啦！
