【暗網版EndGame】集各家之大成 或可阻止執法人員冚檔？
正所謂「道高一尺，魔高一丈」，有網絡保安人員最近就發現一隻新興嘅攔截 DDoS 防禦系統，個名仲好型，叫做 EndGame。不過，呢款工具唔係尋常人買到，因為要識得上暗網論壇 Dread 先買到，佢勁嘅地方係唔單只可以抵擋 DDoS 攻擊，甚至可以抵禦其他入侵者同執法機構嘅行動。
根據 Digital Shadows 嘅研究所講，好多犯罪分子聚集嘅論壇往往都會面對兩個棘手嘅難題，分別係嚟自黑白兩道嘅攻擊，不過無論係行家抑或執法部門，都會試圖用 DDoS 嚟隊冧你個暗網運作。為咗解決以上困擾，EndGame 就好似一款由暗網各個部分一齊構建出嚟嘅工具，真係好似 Marvel endgame 咁，各路（可能係反派）英雄群策群力，一齊對付外來攻擊。
EndGame 基本上就係一款因應暗網而設計嘅反 DDoS 工具，對於網絡犯罪分子嚟講，特別係一班暗網市場嘅持分者，EndGame 提供到一定程度嘅 DDoS 防護，等佢哋有途徑採購反 DDoS 系統。根據發言人所指，雖然 EndGame 係為咗防止欺詐者、bots、DDoS 攻擊而設計，但用嚟對付其他網絡犯罪分子同埋執法機構，呢款工具一樣適用。
發言人又指出，雖然暫時證明唔到 EndGame 功能可以持續幾耐，不過至少短期內都可以有效反制敵人攻擊，直至佢哋重新調整對策或者機制嚟對應呢款新工具。EndGame 現時只得一小部分暗網平台有用，佢哋相信只要再長啲時間，當更多平台都決定用呢款工具，到時就知道 EndGame 有幾大作用。
相關文章：【搵食艱難】Android app螯伏四個月 只為DDoS防毒軟件公司
