【你不代表我】最高級工程師上載有後門Linux修補檔 被揭發華為即割蓆
有好嘢一定會拎出嚟分享，一直係支持 Linux 平台發展嘅原動力，不過，早前華為一個工程師喺上載 Linux 核心（Kernel）碼修補檔案去 Openwall 開發社群後，卻被發現入面藏有後門。華為管理層即刻發聲明指呢個工程師只係以個人名義、用工餘時間嚟開發呢個修補檔案，絕對同公司無關喎！
華為工程師今次上載嘅核心碼修補檔案，原本係話要修補 Linux 本身存在嘅安全漏洞，不過，網絡安全團隊 Grsecurity 喺研究過檔案之後，即日就發現呢個名叫 HKSP（Huawei Kernel Self Protection）嘅修補檔藏有漏洞，可以輕易被利用嚟進入安裝咗嘅系統，狠批呢個檔案完全缺乏安全意識，無做好 threat model 分析。
報告一出，即時引嚟極大迴響，華為管理層亦極速割蓆，發出官方聲明劃清界線，話呢個員工上載嘅檔案只係個人興趣，絕對同公司無關，而華為亦無喺任何產品內用到呢組程式碼，希望可以釋除公眾疑慮。不過，由於呢個工程師係用公司電郵登記嘅帳戶嚟上載呢個檔案，而且檔案名又冠上 Huawei 名義，話「你不代表我」？似乎難以令人信服。而 Grsecurity 喺華為回應後，再發補充指出呢個工程師屬於第 20 級首席安全部門，係華為最高級別嘅技術人員，並唔係一般開發人員，暗示無理由發現唔到呢個後門。至於真相係點呢？就要靠自己判斷喇。
相關文章：【侵侵再輸一仗】英政府有條件使用華為設備
