【WFH 筍工推介】你問我答！白帽客界 3 位賞金獵人嘅入行攻略
疫境下全球失業率急升，但有幾個行業不受影響，如常運作，其中一個就係協助堵塞網絡保安漏洞嘅白帽黑客。
講到黑客，好似一定犯法，其實不然。有道德嘅一班高手，選擇向網絡保安服務商舉報漏洞，以前可能當響朵贏得一官半職，隨著網絡安全得到重視，賞金平台 HackerOne 開張大吉，一班白帽黑客就可以靠賞金過活。係咪好想知點樣入行？賞金行情？由曾黑入美國政府嘅 Tommy DeVoss、由程式員轉職嘅 Cosmin、HackerOne 首位累計過百萬美元賞金嘅 Santiago Lopez，三位全職賞金獵人向大家披露入行心得。小編將之總結成以下 5 大重點。
實質工作流程係點先？
要睇大量文件、熟用 Burp、Sublist3r、dnscan，亦要開發個人工具、不斷吸收最新網絡保安資訊、寫報告、搵出自己擅長嘅保安範疇與策略等。技巧方面，唔可以只參考一個黑客嘅工作方式，要喺唔同人身上偷師，融會貫通，建立個人風格。呢份工好花時間，有時埋門一腳會被人截糊，第 2 名係一蚊都分唔到，所以唔好以為真係篤吓電腦就有錢袋咁 naive，真係要有興趣「捉蟲」，保持好奇心，享受破解嘅快感，唔好下下用錢衡量付出。
收入有幾多？
一個有料嘅白帽，每星期做 40 個鐘，一年輕鬆賺 7 位數美元。以 DeVoss 為例，佢一個月做 10 至 40 小時，2019 年收 90.3 萬美元。入行至今，最高單一賞金為 2.8 萬美金，最高單日收入 18 萬美金。DeVos 有幾叻？佢 10 歲就透過 Chatroom 學曉黑客技術，高中技癢闖禍屢勸不果，結果黑入政府保安系統而被捕，收監 4 年，司法機構講明再犯唔駛旨意出獄。多得賞金獵人工種，佢先可以從事合法又有興趣嘅工作，賺錢過理想生活。
鍾意開工唔鍾意就休息，得唔得先？
答案係得嘅，賞金制好處係狀態好時可以谷，狀態差可以縮，唔使鑽牛角尖。另一特點係時間夠彈性，隨時可以放假，參加世界各地黑客交流會。當然收入方便都「彈性」，運氣好壞嘅月份相差可以好大。另外，長期孤獨工作都係一份考驗，要適當調整工作日程，以防過度燃燒。
行業競爭大唔大？
最近越來越多人入行，競爭越來越明顯，特別係新世代都唔鍾意企業束縛。3 位白帽都表示好歡迎良性競爭，因為 IoT 普及，越來越多產品都同互聯網連接，保安漏洞嘅影響亦更廣範，而 IoT 開發商本身對網絡保安陌生又唔重視，變相製造網絡漏洞，令需求大增，所以行業前景頗明朗。
初哥入行有乜建議先？
唔建議一開波就做全職獵人，最好試半年 Part Time 先，因為呢個行業嘅學習曲線好斜，有心理準備頭一年無咩肉食，重點係適應節奏同生活模式，學習技巧吸收經驗。真係要全職做，入行前要準備好一筆資金，或有其他收入，支撐到一年開資先好瞓身。
相關文章：【報名參軍！】出席DEFCON 有機會喺五角大樓返工
