【有懷疑唔好裝】Google Play嚴打手機app取用權限

Google 嘅 Android 智能手機應用軟件商店 Play Store， 一直俾人垢病把關不力，成日有內藏惡意軟件嘅 app 上架。當中原因，係 Android app 嘅取用權限政策過於寬鬆，開發者可以較容易攞到一啲同自己隻 app 功能無關嘅手機功能權限，例如影相 app 會問用家拎埋聯絡人使用權限等等，其實可能未必同隻 app 本身嘅功能有關係，但 Google 方面又會批准上架喎，首先咁做已可以增加到開發者竊取私隱嘅風險，另一方面，如果搞唔清楚攞到呢啲權限原來會出現系統漏洞，同樣會造成私隱危機，好似上年網絡安全研究團隊 Checkmarx，發現 Google 及 Samsung 嘅智能手機存在極大漏洞，原因只係其中一隻影相 app 攞到記憶卡存取權限，跟手就可以做到偷錄通話音效、隨時開啟手機鏡頭及拍片等功能。

有見及此，Google 其實由 2018 年開始，已逐步收緊手機應用軟件攞取用無關功能嘅權限政策，至今已將約 79 萬隻有問題應用軟件下架，不過，喺把關上依然未算全面，例如上年嘅 CamScanner 惡意應用軟件，就容許黑客將木馬程式裝入手機，另外仲有 1300 隻應用軟件即使喺用家拒絕授權嘅情況下，依然可以攞到相關取用權限，所以 Android app 喺安全性上一直被認為低過 Apple 嘅 iOS app。

雖然未算完全，但 Google 一直都改進緊，例如最近佢嘅就公布，現時已有 98%  Android app 係唔會攞用家嘅 SMS、通話紀錄等讀取權限，某程度上可以防止黑客非法收集呢啲資訊，用嚟發動釣魚或社交工程攻擊。不過，各位 Android 用家都係要繼續保持警惕，如果懷疑新安裝嘅應用軟件要求取用過多權限，不妨幫手 report 俾 Google 團隊，等佢哋深入調查，救己救人喇。

資料來源：https://bit.ly/2P3w3PZ、https://bit.ly/2P3w3PZ

相關文章：【突破盲腸】輕取一個權限 將Android手機變監控機器