【識得嗌唔好】Facebook開放Off-Facebook Activity私隱自決功能
Facebook 上年首先開放俾愛爾蘭、西班牙及南韓用家測試嘅 Off-Facebook Activity 私隱自決功能，而家已經開放俾全部用家使用喇，唔想自己嘅網上行為俾 Facebook 過度收集，即刻去設定搞搞佢啦！
作為全球其中一大廣告平台，Facebook 一直以各種手法嚟收集網民嘅行為習慣，就算你無用 Facebook、Instagram 都好，都會有網站、手機應用程式將你嘅一舉一動同 Facebook 分享；除咗 Facebook 之外，Google 亦做緊相同嘅事，所以只要你有上網，就一定會發現睇到嘅廣告、活動宣傳都係度身訂造。
終斷行為分享
既然靠呢樣嘢賺錢，所以當 Facebook 話俾用家自決將唔將自己嘅網上行為有限度封閉，聽起上嚟真係好唔現實。不過，Facebook 而家真係俾用家自決喇，只要進入 Off-Facebook Activity 設定版面，就可以睇到究竟有邊啲網站同手機應用程式，會將你嘅行為同 Facebook 分享，而且仲可以中斷呢啲分享行為添。
用戶只要點選 Off-Facebook Activity 功能，就可以檢查被追蹤嘅網頁、應用程式以及相關資料。同時，用戶可以選擇 Clear History，刪除瀏覽紀錄，又或喺 Manage Your Off-Facebook Activity 入面揀 Turn off future activitiy，咁日後 Facebook 就唔可以喺呢啲渠道採隻到可以聯繫到你個人身份嘅行為資訊。
點解要講得咁仔細呢？因為 Facebook 嘅一貫做法係會為每個瀏覽活動建立一個獨立嘅 SID，然後將 SID 對應用戶嘅 UID，從而獲得每個用戶嘅瀏覽資料。Turn off 後只係移除 SID 與 UID 之間 mapping，並冇真係刪除資料。簡單嚟講，即係 Facebook 仍然擁有收集到嘅資料，只不過冇將 SID 與 UID 配對。另外，Clear History 選項只會刪除過往紀錄同用戶之間嘅關連，而且將來係會繼續分享，同時間一刀切清除，亦會令用戶登出晒所有以 Facebook 登入嘅帳戶，所以如果唔想從頭登入，都係乖乖哋逐一檢查同決定係咪 Turn off 啦。
順帶一提，瀏覽器版本嘅 Facebook 可以喺 Settings>Your Facebook Information 內搵到 Off-Facebook Activity，手機版亦可以喺 Settings and Privacy 內搵到。
相關文章：【FB用戶福音】全新功能 Off-Facebook Activity 助你私隱自決
