【黑客全反擊】Microsoft嶄新SIEM方案登陸香港

近排唔少 IT 公司先後發表 2020 年網絡安全趨勢預測，而作為 IT 巨頭嘅 Microsoft 亦喺早前發表報告，由於佢哋每月掃描超過 4,700 億封電郵去檢測網絡釣魚同埋惡意軟件動向，所以喺預測方面自然好有睇頭，又不妨睇吓佢哋點講？

人工智能攻防戰

運用人工智能去對付黑客，係而家好多網絡安全工具都會應用到嘅技術，不過，Microsoft 指出 AI 亦會被黑客用嚟攻擊，編寫更具破壞力嘅惡意軟件，預計今年會有更多新型電腦病毒出現，令病毒偵測變得更困難。

加強保護供應鏈

有調查指出 2020 年全球將有超過 750 億件流動裝置（包括 IoT），但缺乏安全更新或防護措施不足，都會令黑客有機可乘。為咗應付呢個問題，網絡安全服務供應商應加強保護客以及其供應鏈部分，例如 Microsoft Identity 平台就為 140 萬個應用程式提供額外嘅多重身份驗證功能。

公共雲設防禦關卡

三分之二企業正在或計劃在不久嘅將來採用混合式雲端服務，而喺 2019 年全球雲端市場就錄得 40% 增長，所以 Microsoft 預計增長將會持續，公用雲端同埋混合式雲端將成為提升網絡安全工具嘅關鍵。企業可考慮檢查登錄位置或輔助身份驗證等不阻礙網絡流量嘅方法。

零信任保安系統

2019 年有超過 40 億項資訊外洩事故，喺眾多已確認嘅事故中，有 63% 涉及使用低強度或預設密碼，以及密碼被盜取。最佳嘅防禦方法係採用「零信任」保安系統，拒絕自動信任外圍任何資訊，即使有不法分子成功攻破企業防火牆，系統仍然會要求進行其他身份驗證，例如生物識別和身份驗證，有效提高安全性。

新服務減企業負擔

另外，Microsoft 亦同時喺香港發布 Microsoft Azure Sentinel 雲原生 SIEM 解決方案，結合 Azure 及 AI 功能，可快速分析企業嘅大量數據，過濾雜訊，同時大大減少誤報率，減輕企業 IT 人員嘅工作負擔。以英國零售品牌 ASOS 為例，Azure Sentinel 就喺首六個月內分析了 ASOS 37 億個潛在網絡保安事件，發出 3,100 個警報，而且自動成功解決 519 宗，為對方嘅網絡保安團隊減少一半處理時間。透過 Azure Sentinel 方案，將有助企業應付上述嘅四大趨勢。

資料來源：https://bit.ly/2RicpBj、https://bit.ly/2RgXMyj

相關新聞：【使錢最叻】 Microsoft 公布亞太區人工智能應用調查 香港只得花費一項取勝