【漏洞公開定收埋？】要美國NSA特務組織先評分？
Microsoft 已經停止支援 Windows 7，搞到唔少用家都趕喺最後機會免費升上 Windows 10。不過，Windows 10 都唔係安全好多，因為剛啱又俾人發現，系統內其中一個用咗十幾年嘅 CryptoAPI 存有漏洞，可以俾黑客利用嚟假扮已獲數碼簽證嘅軟件，繞過電腦嘅網絡防護功能，從而喺目標電腦上安裝惡意程式。如果大家仲記得，上年 ASUS 就因為俾黑客偷咗數碼證書，令黑客可以將有毒嘅更新檔放上 ASUS 自動更新軟件褲，再推送出去俾過百萬用家。另外，亦有大學專家漏洞可被利用嚟攔截及修改 HTTPS 嘅通訊，將受害者引導去虛假網站偷取資料，影響力非常之大。
不過，升級上 Windows 10 始終有保障，因為 Microsoft 知道有漏洞後就會盡快作出修補，咁就可以大大減低被攻擊嘅風險同埋減低漏洞嘅破壞力，但前提係 Microsoft 首先要知道有呢個漏洞先得喎，因為除咗黑客未必會上報外，就連美國政府安全組織 National Security Agency（NSA），都會經過一輪評估先決定通唔通知涉事公司，例如兩年前爆發嘅 WannaCry 勒索軟件，就被認為係 NSA 唔通知 Microsoft 有名為 EternalBlue 嘅視窗系統漏洞存在，但佢哋選擇唔出聲，暗中通過漏洞嚟監視目標人物，之後先至搞到 WannaCry 有咁大破壞力，鎖死咗數以千計嘅電腦。
根據傳媒報導，NSA 曾承認一旦組織發現漏洞，會先進行內部評估，睇吓呢個漏洞究竟應該留番俾政府用嚟打擊敵人，抑或通知相關公司去堵塞。雖然無透露評分標準，但諗吓都知，只要受影響範圍愈大而又愈隱閉，NSA 應該都會收埋嚟用，方便自己監視敵人。而今次漏洞嘅嚴重性只係被 Microsoft 評級為「important」，咪可能因為咁先會公開囉。Microsoft 方面確認暫時見唔到有人利用呢個漏洞發動攻擊，但就建議大家盡快升級 Windows 10 系統喇。
相關文章：【特赦犯案黑客】法官話：正面有太多貢獻
