【新年新開始】Facebook打假 AI人樣帳戶大掃除
雖然 Facebook 話會全力打假，將平台上嘅造謠者、假新聞統統刪除，但好多用家都係聽吓就算，心諗一間靠用家參與、收集個人興趣嚟賺廣告費嘅公司，點會咁落力剷除內容呢？但事實上，Facebook 上年 8 月的確移除咗唔少嚟自中國嘅造謠帳戶；而喺上年頭 11 個月內，更移除合共 54 億假帳戶，比起 2018 年全年嘅 33 億大增 6 成有多。嚟到上個月，Facebook 再利用新嘅 AI 識別技術打假，將合共 900 個包括個人帳戶、專頁及群組刪除，到底係點做到嘅呢？
其實今次 Facebook 利用嘅技術，就係以人工智能去判斷用戶嘅 profile 相到底係咪用人工智能產生出嚟。雖然 AI 已經可以好成功咁產生一張幾可亂真嘅人像照，但專門研究虛假消息嘅組織 Graphika 及 DFRLab 嘅專家就指出，相關嘅 AI 技術的確可以成功產生人樣及視覺層次，但就唔多理解人體構造，而且對一啲背景及對稱物件例如眼鏡、耳環等出現明顯嘅瑕疵，所以仍然可以透過分析圖像內容，去分辨到底係咪 AI 人樣。
專家又再詳細解釋，今次可以話係最大規模運用 AI 打假嘅行動。而負責製造呢啲假帳戶嘅幕後黑手，係一間植根美國嘅媒體公司 BL network，專家話由 BL network 控制嘅假帳戶，一共應用喺 80 個群組及專頁入面，用嚟為美國總統 Donald Trump 造勢，發放正面訊息；喺其中一個群組嘅 15 個管理員中，更發現有 9 個帳戶嘅 profile 相係 AI 產生出嚟，所以話，Facebook 的確應用緊唔同方法去剷除假帳戶假新聞，絕對唔係得個講字嘅。不過，以現時 AI 嘅學習能力，相信上述瑕疵將會好快被克服，到時又可能會大規模出現虛假帳戶喇。
相關文章：【FB用戶福音】全新功能 Off-Facebook Activity 助你私隱自決
