【求職陷阱】LinkedIn 假招聘暗藏木馬程式
過咗農曆新年，又係打工仔求變嘅旺季。作為IT從業員，為咗提高被獵頭嘅機會，自然識得利用 LinkedIn 等職場社交平台去增加曝光率。不過有資安機構就警告，自從上年中開始，發現越來越多黑客利用呢個平台，誘騙求職者開啟惡意連結或附件，從而下載及安裝 More_Eggs 木馬程式喺對方嘅電腦入面，成功操縱受害人嘅電腦。
首先黑客會喺 LinkedIn 開一個虛假職業仲介公司帳號，然後誘騙目標人物建立關係；相隔一個星期，黑客就會發出一個載有招聘職位資料嘅電郵，要目標人物打開連結，進入預設嘅虛假網站，下載及開啟 Microsoft 文件檔或 Javascript。只要目標人物打開檔案或允許執行 Macros 指令，接住落嚟系統就會自動執行安裝木馬程式指令；另一個情況係電郵內會附有一個無法開啟嘅 PDF 檔案，誘騙目標人物打開旁邊嘅連結去虛假網站。
雖則話騙徒手法層出不窮，但今次呢條橋其實一啲都唔創新，中招嘅原因主要係出喺人心之上。奉勸各位準備搵工嘅人士，千祈唔好咁容易打開陌生人提供嘅連結，否則只會得不償失。
