【救人自救】誤裝惡意程式 月耗 10GB 數據用量
唔知有無 Android 手機用家發現，最近啲 Data 數據用量好快乾塘，兼夾手機成日好似暖蛋咁熱？有嘅話就要小心喇，可能你部手機已裝咗藏有 DrainerBot 惡意廣告代碼嘅軟件，暗掗地幫你不斷睇廣告，每個月可以消耗 10GB 數據用量及不停為手機放電之餘，仲連品牌投放喺廣告上嘅預算都搾乾埋，好陰毒呀！
講緊嘅係全球企業軟件供應商 Oracle 早前發現，一款名為 「DrainerBot」嘅惡意廣告代碼，開始喺 Google Play 上嘅應用程式內出現，佢嘅作用，係會自動向廣告供應商要求下載廣告影片，但只會隱形播放，絕對唔會喺應用程式內嘅廣告位上出現，所以大部分受害者好難發現已經中咗招，只會懷疑自己係睇片或玩 Facebook 時洗大咗。
除咗手機用家受害，就連品牌一樣被牽連，因為呢啲已被「機械人」點擊播放嘅廣告，當然需要品牌找數，廣告費用猶如直接倒錢入海。而更無辜嘅係，因為好多開發者只係將下載廣告嘅程式代碼直接放入應用程式內，經過今次事件，連商譽都損失埋，呢鋪真係全世界都輸，唯獨廣告供應商有錢落袋。
根據 Oracle 嘅調查發現，Perfect365、Draw Clash of Clans and Solitaire: 4 Seasons 等手機應用程式內都含有 DrainerBot ，喺 Google Play 上合共被下載超過一千萬次。 而團隊亦好快追蹤到惡意代碼嘅源頭，係來自荷蘭一間主要業務為幫助應用程式開發者通過廣告賺取費用嘅公司 Tapcore ，不過，對方已好快走出嚟澄清並無參與呢件呃錢活動。
無㖮最後調查結果係點都好， Android 用家梗係解決咗自己嘅問題先。如果想知道自己有無中招， Android 手機用家可以用以下方法檢查。
1. 進入 「設定」＞ 「數據用量」＞「流動數據用量」，檢視邊隻應用程式嘅數據用量出現異常。
2. 如發現異常，可以點擊應用程式，然後將「背景數據」功能關閉
