【洗底有法】重設廣告 ID 停收追蹤廣告
外國有研究指出，Google Play 上大約有 17,000 個 app，過份收集用家嘅永久識別碼，包括無法更改嘅IMEI裝置序號、難以更改嘅 Android ID，有可能違反咗 Google 嘅廣告資訊收集政策，亦令到手機用家無法有效消除自己嘅網上足迹，其中包括大受歡迎嘅 Clean Master、Flipboard、Angry Birds Classic 等等。
其實用瀏覽器上網或用手機 app，好多時大家都會發現入面嘅內嵌式廣告同自己好有關係，例如自己爬緊旅遊文，好快呢啲廣告就會變成平價機票、酒店格價網等資訊。咁貼身嘅設計，全因廣告公司採用「行為廣告」（behavioral advertising）模式，通過收集用家平時上網關注嘅內容，再push返對應嘅廣告內容俾客戶，既幫到廣告商接觸目標客戶群，消費者亦攞到比較有興趣嘅廣告資訊，本來真係可以話Win Win。
隨住社會人士開始注重私隱問題，用家擔心洩露以上嘅身份證明有潛在風險，因為 IMEI 無得改，Android ID 亦要將部機復原出廠設定先改到，當用家想「洗底」，唔再收某啲廣告，可能就要買過部新機或開新 ID 啦。為咗保障用家私隱，Google 喺 2013 年推出可以隨時更改嘅「Advertising ID」，只要用家喺「設定」→「Google」→「廣告」選項內，就可以重設 ID 甚至選擇唔再接收個人化廣告，輕鬆洗底。而 Google 亦規定只要係為咗廣告宣傳而收集私隱，手機 app 開發商就只能夠收集廣告 ID，如伴隨其他永久識別碼，就必須喺安裝時徵求用家同意，唔可以暗掗底取得權限，否則 Google 有權將手機 app 下架，甚至採取其他法律行動。
事件曝光後，Google 即時回應已採取行動跟進。個人方面，要點先可以減少呢啲個人私隱過份採集？撇除開發商刻意隱瞞之外，用家最重要係唔好偷懶，每次裝 app 前要睇清楚採集用途，唔好輕易將永久性裝置標誌拱手相讓，亦唔好安裝 Google Play 商店以外嘅 app，就可以減少中招。
