【wepro小教室】SD-WAN

SD-WAN（A Software-defined Wide Area Network，軟體定義廣域網絡），可以將網絡數據流量管理，由傳統嘅硬件設備，通過軟件方式「雲化」，事關喺以雲端為中心嘅環境，傳統廣域網絡（WAN）已經唔太適用。

要知道乜嘢係 SD-WAN，首先要知乜嘢係 WAN。

WAN 即係 Wide Area Network，係指跨越地理區域嘅網絡，通常由多個 LAN（Local Area Network，區域網絡）及其他 WAN 互相連接而成，就好似大家用緊嘅互聯網，都算係 WAN 嘅一種。對於企業嚟講，WAN 可以連接不同地點，例如分公司、遠程辦公室同數據中心，通常向單一網絡廠商購買，所以費用比較貴、而且唔夠靈活。

SD-WAN 就係一種更具彈性嘅 WAN 結構，係用咗 SDN（Software-defined networking，軟體定義網路）技術。所謂 SDN 技術，即係可以透過軟件管理網絡。基本上所有 SD-WAN 都係用 SDN，但唔係所有用 SDN 構建嘅網絡都係 SD-WAN。

所以，SD-WAN 比起傳統 WAN 搭建更輕鬆靈活，慳錢之餘又可以有擴展性，仲可以通過加密、身分驗證、防火牆、威脅檢測同網絡分割等多種措施，實現多層次安全保障。