【頭號敵人】IT 部阿頭要留意 咪再睇小廣告欺詐
作為一名 CISO（Chief Information Security Officer），亦即係資訊科技安全主管，有住同 CEO、CFO 睇齊舉足輕重嘅地位，就知一啲都唔嘢少，近年網絡危機層出不窮，要保障企業網絡安全，作為阿頭就必須要與時並進，有專家就提醒一班 CISO，未來要更加謹慎防範廣告欺詐，呢種將會愈趨普遍嘅網絡罪行。
隨住數碼營銷日漸興起，企業紛紛將廣告由實體轉移到網上，喺新冠肺炎疫情之下就更加明顯，以致到廣告欺詐呢類網絡罪行被帶動，有估計直到 2023 年，企業用嚟應對廣告欺詐嘅成本，可能達到 1 億美金，好得人驚呢。
廣告欺詐（Ad fraud）亦都叫做無效流量（Invalid Traffic），唔同點擊欺詐，廣告欺詐係指黑客透過開設虛假網站廣告，藉住曝光、點擊、轉換率等嘅指標嚟賺錢。通常就個啲社交媒體或者網站上面嘅橫幅廣告、或者應用程式見到嘅廣告，呃啲假流量嚟賺錢。
而佢最令資訊科技安全主管頭痕嘅地方，係廣告欺詐可以話係最容易，而且最好搵嘅網絡詐騙方法，仲好搵過信用卡、比特幣同埋銀行詐騙。根據一份有關 2020 年全球 CIO 狀況嘅報告顯示，今年全球企業用係資訊科技保安嘅開支，將會高達 1238 億美元（折合大約 9600 億港紙），有機構就預計，廣告欺詐將會喺 2023 年令企業嘅網絡保安花費 1 億美金（折合大約7.75億港紙），而且佢地更加指出，好多主管仲未為意到個問題有幾嚴重，有啲甚至只係當呢啲開支係交稅。
係呢度補返少少資料畀大家，喺上年年中，Google 就將中國大型應用軟件發行商 DO Global 旗下 46 個應用程式下架，原因就係因為佢地發現有人通過惡意程式碼偽造用家點擊廣告次數，即使用家無打開隻 app，依然會在背後播放廣告，偽造點擊次數嚟賺取廣告費用，或者你唔係咩 CISO，不過都唔好中計，咪俾機會人當你係水魚啦。
