【有險可守？】Visa 信用卡非接觸式支付漏洞 不知不覺碌爆卡
香港人而家已經習慣電子支付，尤其係疫情下大家為咗避免用實體貨幣購物，更加速咗呢種付費方式。就算用信用卡俾錢，都傾向非接觸式付款，呢種方法嘅好處係設有金額上限，用嚟買啲幾百蚊貨仔嘅嘢，完全唔需要簽名認證，非常方便。不過，一班瑞士學者就發現呢種方法存在漏洞，可以突破金額限制進行交易，對卡主毫無保障！
正常嘅非接觸式支付過程，係 POS 收費系統發出收費指示後，卡主人拍卡進行付費，如果金額超過上限，就有需要額外輸入密碼去確認，不過專家就喺交換訊息過程中做手腳，將毋須額外密碼驗證嘅訊息傳返俾 POS 系統，成功突破盲腸。不過，要達成呢種攻擊手段，專家話要預備四種材料，首先要有兩部 Android 手機，開發小組研製嘅應用程式同埋一張非接觸式 VISA 信用卡。兩部智能手機要分別安裝 Android 特製程式，令佢哋分別模擬 POS 收費系統及信用卡，而呢兩個特製應用程式係唔需要破解手機先至可以安裝，專家話佢哋已成功喺 Google Pixel 及華為手機上試驗過，同埋亦喺真實店鋪內成功通過測試添！
至於運作過程又係點呢？首先扮演 POS 系統嘅 Android 手機向真信用卡發出付款請求，然後將付費訊息經 Wi-Fi 傳送至扮演信用卡嘅 Android 手機上，經應用程式修改付費訊息，內附毋須使用密碼驗證資訊，之後再用呢部手機拍向真 POS 系統，咁就完成咗交易，係咪好簡單呢！專家話已經將呢個漏洞通知咗 VISA，不過對方暫時未有任何回應喎。
唔好以為淨係 VISA 卡先出事喎，專家指舊嘅 Master 信用卡就存在另一漏洞，當佢同 VISA 信用卡喺離線 POS 系統進行交易時，由於只有發卡行可以進行加密驗證，所以只要專家用類似手法欺騙 POS 系統接受呢筆離線交易，就可以光明正大拎住Shopping 戰利品行出鋪頭，當店鋪進行定期結算時，發卡行收到呢啲詐騙交易記錄，到時都唔可以怪間鋪頭啦！
