【反監控新科技】「鱷魚獵人」反攻假 4G 手機發射站
現今科技日新月異，用家對科技產品同服務嘅要求愈來愈高。不單止你部手機會進化 — 大家密切關注嘅監控技術其實都與時並進。講到呢度，大家可能已經會開始擔心：以往嘅監控技術其實都唔係話冇威脅，而家佢地仲要加強？點算好？到底係咩嚟？…定 D 嚟，睇埋落去，將你地嘅問題一一解開，仲可能帶俾你一絲曙光。
監控技術當中最常見嘅其實係一種叫做「魔鬼魚」﹙Stingray﹚嘅假冒手機發射站。呢種發射站會 Jam 咗 3G 同 LTE 等等嘅服務，強逼手機連線到不受保障﹑難以加密嘅 2G 網絡上面。當手機連咗上去，監測者就會得到大量用家手機資訊，例如即時位置，IMSI ﹙International Mobile Subscriber Identity﹚ 號碼等等 — 唔好以為冇咩重要野，你手機上面嘅 Record 全部都喺監控人面前無所遁形﹗但喺而家呢個年代，Jam 咗 3G 都冇用 — 個個都用 4G，甚至 5G。所以為咗追蹤埋呢 D 用家，專係研發監控科技賣俾執法部門嘅 Harris Corp. 就推出咗一隻新產品 — 「Hailstorm」，專攻 4G 網絡。
不過，你有張良計，佢有過牆梯﹗就喺呢幾日，為咗保護全球網絡人權嘅 NGO， Electronic Frontier Foundation ﹙EFF﹚就研究出一樣專係反吸呢種假冒 4G 手機發射站嘅追蹤器。佢地將呢種科技命名為「鱷魚獵人 (Crocodile Hunter) 」，可以幫大家分辨到底一個 4G 發射站信號嘅真僞。
咁到底呢隻「鱷魚獵人」係點運作呢？其實之所以我地嘅資料會被監測，係因為手機連接到發射站嘅時候，會進行「握手」— 交換佢地嘅 Master Information Block﹙MIB﹚同 System Information Block ﹙SIB﹚資料。呢個時候，一個正當嘅發射站係唔會多次傳輸呢 D 資料嘅。但係如果有人有非份之想，就會有多出平時好多倍嘅傳輸量。「鱷魚獵人」就係可以 Detect 到呢個傳輸量之異，從而判斷一個發射站嘅真假。
道高一呎﹑魔高一杖。「Hailstorm」聽落可能好恐怖，但係始終都會有人企出嚟提供更強嘅方案。不過又唔好咁老定，「鱷魚獵人」雖然係 Open Source ，但係必須要買多部機，「軟硬兼施」先用到佢。再加上，「鱷魚獵人」嘅開發者自己都指出，「鱷魚獵人」只係可以 Detect 到可疑嘅發射站 — 唔代表佢一定有問題。不過起碼對反監控踏出咗新一步。
唔想錯過熱門網絡保安消息，請即訂閱 wepro180 電子周報：https://bit.ly/2ZcCi9J
