【唔係卸膊】上雲包埋數據安全？ 供應商：「客戶都有責」！

作為一個雲服務供應商嘅技術支援人員，平時都收到唔少企業客戶投訴，問點解搬咗啲嘢上我哋嚿雲之後，竟然仲俾人入侵到去佢個 database？其實而宜好多企業管理者都以為將虛擬機、應用服務或數據搬上雲，我哋就會幫你守穩大門，唔會俾黑客入侵，但其實條款一早已寫明係「共同責任」模式（Shared Responsibility Model）嚟㗎！

呢個謬誤其實相當普遍，一來個客未必理解雲端服務嘅運作原理，二來幫襯時亦可能遊咗魂無聽清楚我哋提供嘅保障內容。事實上，公司一早已喺服務條款內寫明，只會確保提供嘅基礎架構、服務嘅安全性，而客戶必須負責自己嘅數據防護。

咁樣做絕對唔係「卸膊」，而係因為幫襯嘅客來自各行各業，採用嘅應用方案亦五花百門，試問我哋點可以一個 settings 招呼晒所有客呢？以 Web Application Firewall 為例，e-commerce 平台同一般企業客戶嘅設定已好唔同，前者要考慮準確過濾惡意連線之餘而唔會擋埋正常顧客，後者基本上就只會俾員工訪問數據庫，所以只可以留返俾客戶自己搞。仲有嘅係如果企業員工嘅安全意識不足，唔小心中咗釣魚電郵俾黑客攞到登入帳戶權限（最新鮮例子係 Twitter），雲供應商又點擋到呢啲表面上屬於合法登入嘅入侵？

另一方面，Web Application 同背後用到嘅 API 絕對係對外開放，而最終目的地自然係客戶嘅數據庫，莫講話我哋照顧唔到各企業採用嘅工具同設定，就算係企業自己，亦會因工具同工具之間嘅數據無法溝通，而掌握唔到出入嘅數據有無可疑，試問我哋又點樣幫你守穩門口呢？講出嚟你都唔應該信啦！

所以話，企業喺採用雲端服務嘅時候，態度亦要好似管理傳統 IT 架構一樣，嚴格做好權限管理，除咗安裝 Web Application Firewall 之外，亦要保護 API、數據庫嘅安全，同時做好雲服務嘅登入金鑰管理。一句到尾，各種工具嘅數據傳輸必須要做到可溝通同資訊透明，咁先可以減低被入侵嘅風險，真係有事搵到嚟，我哋都幫你唔到㗎！

如果你都有觀點、見解、評論想與大家分享，歡迎投稿：[email protected]