【竊聽風雲】竊聽你電話 7000美金就搞掂

    睇過「竊聽風雲」嘅朋友,都會覺得原來偷聽係要咁大陣象,真係無「國安級」嘅設備,可能都未必做到。不過有研究人員就發現,有不法之徒利用高清通話(透過 4G LTE 網絡所連接嘅通話服務)存在嘅漏洞,偷聽手機對話,而用嚟偷聽嘅裝置費用,只係需要 7000 美金,即係大約 54000 蚊港紙。

    一般流動電訊商都會用相同嘅加密金鑰,嚟保護透過同一手機訊號發射站,進行嘅多個 4G 語音通話。而研究人員就發現,當流動電訊商用一樣嘅金鑰嚟做加密,或者手機訊號發射站會重複用同一個密碼,又或者用可預測的AI演算法生成加密金鑰,就好容易成為竊聽者攻擊嘅對象。

    竊聽者嘅攻擊分為兩個主要階段,第一個階段係記錄階段,透過截取目標裝置嘅加密無線訊號(亦稱為第一個通話),記錄低目標裝置同受害者之間嘅加密訊號,喺呢個階段,竊聽者要有一部可以偵察到無線電層傳輸方向嘅裝置,唔知鴨記有無得賣,不過部嘢真係唔洗 1400 蚊美金就做到。當偵察到目標配置,竊聽者可以對目標無線電嘅配置記錄進行解碼,直到拎到佢嘅加密資料(PDCP)。

    當第一個通話結束,竊聽者就會進行第二步:呼叫階段,就算竊聽者手上並無受害者嘅任何金鑰解碼嘅材料,竊聽者都可以係第二階段用一部商用現成電話,知道受害者嘅電話號碼同佢而家嘅位置,然後打畀受害進行第二次通話,再用第二次用到嘅加密流量同第一次通話嘅流量進行比較,從而推斷出加密金鑰嘅位置,一旦有咗呢段「金鑰流」,竊聽者就可以利用佢嚟恢復返第一次通話嘅內容,專家將呢個漏洞命名為 ReVoLTE。(詳情參看下圖)

    研究人員亦都提醒,竊聽者與受害者傾電話嘅時間越長,佢可以能夠解密先前對話嘅內容就越多,又指出發起 ReVoLTE 攻擊嘅設備成本只係需要 7000 美元,肯定係其他 3G / 4G 移動攔截設備之中比較低成本嘅一種,通常係俾執法人員或者犯罪集團使用。佢地又隨機分析咗成個德國嘅發射站,發現有8成的用家係用相同嘅加密金鑰或可預測的金鑰,令用戶好易遭受 ReVoLTE 攻擊。但佢地亦都正努力研究辦法堵塞漏洞。

    資料來源:https://bit.ly/2Y666DZ

    唔想錯過熱門網絡保安消息,請即訂閱 wepro180 電子周報:https://bit.ly/2ZcCi9J

    #7000美金 #ReVoLTE #VoLTE #漏洞 #竊聽電話 #竊聽風雲

    相關文章