【捉字蝨】數據安全做得好 數據隱私都可以靠唔住？
每次講到數據隱私（Data Privacy）同數據安全（Data Security），好多人都以為係同一樣嘢嚟，但原來佢哋係有分別㗎，Facebook 向 Cambridge Analytica 出售用戶資料事件，就係最佳例證！
保護個人私隱係唔少國家嘅首要任務，好似歐盟兩年前生效嘅 GDPR（General Data Protection Regulation）及美國上年成效嘅CCPA（California Consumer Privacy Act），都係為咗保障國民私隱而成。GDPR 嘅罰款可以高達幾十億美元，而 CCPA 就按人頭計，每個個人私隱外洩嘅罰款由 2,500 美元起計，真係可以令出事企業一鋪清盤，再加上而家仲有 30 個國家都商議緊呢啲法例，所以企業絕對唔可以掉以輕心。
不過，數據隱私同數據安全到底有乜嘢唔同呢？其實前者係數據擁有者點樣處理呢啲私隱，而後者就係佢哋用啲乜嘢方法去保護數據。舉一個實際發生過嘅例子，Facebook 喺 2016 年美國總統大選嘅時候，將佢哋用戶嘅數據交咗俾市場推廣公司 Cambridge Analytica 使用，結果有研究顯示，美國總統特朗普當選，就同 Cambridge Analytica 係社交平台針對性發放利好消息有關。咁 Facebook 有無觸犯私隱外洩呢？事實上又無喎，首先 Facebook 的確有好多保護措施，去防止黑客入侵盜取用戶私隱，喺 Data Security 方面係做得充足。之不過，由於 Facebook 用戶喺登記使用服務時，無留意到其中一條條款係授權俾Facebook，將佢哋嘅私隱分享俾市場推廣公司，所以 Facebook 同樣無違反 Data Privacy 協議。
有咗呢個例子，兩者分別就易明好多，即係就算間公司有晒最齊全嘅 Data Protection 防禦措施，阻止黑客入侵盜取用戶私隱，但用戶都唔可以掉以輕心，如果唔想自己嘅私隱俾其他人使用，奉勸各位下次登記新服務嗰陣，點都要花時間睇清楚使用條款喇。
唔想錯過熱門網絡保安消息，請即訂閱 wepro180 電子周報：https://bit.ly/2ZcCi9J
