【Twitter Hack 大結局】法網恢恢，17歲幕後黑手最終被擒﹗
早排令人聞風喪膽嘅 Twitter Hack 黑幕 Kirk，終於喺多日嘅調查同追捕之後被美國佛羅里達洲警員拘捕。估都估唔到，呢一位膽大包天，先前睇落無跡可尋嘅黑客年僅 17 歲。先前有份供佢出嚟嘅 eversoanxious 同另一位 Hacker Rolex 都同時被提告，真係冇一個人逃得出呢座五指山。
Kirk 嘅真名叫 Graham Ivan Clark，唔好睇佢年紀輕輕，其實由 10 歲開始，佢就過住「偷呃拐騙」嘅生活。佢自細已經喺 Minecraft 遊戲同 Forum 上用多種手法呃人——買賣虛擬裝備唔找數﹑唔交貨，仲有同今次事件有異曲同工之妙嘅行為——賣Username。正所謂「小時偷針﹑大時偷金」，短短五年後，佢已經將自己嘅呃人技術同膽量練到爐火純青。正式加入網上 Hacker Forum ，再喺一年後成功盜取總值約六百萬港元嘅身家。同時都會喺 IG Facebook 之類嘅 Social Media Show Off，完全冇一絲嘅罪惡感。
喺法庭上面，Kirk 並唔能夠同法官正常對答，所以最後獲得押後用視像形式再審。雖然佢嘅所作所為真係非常嚴重，但喺將佢標榜成一個千夫所指嘅惡人之前，可能大家都要聽下佢嘅經歷。Kirk 7 歲時就因父母離婚而同父親分開住。再加上母親作為俄羅斯移民嘅身份，Kirk 嘅成長都唔可以算係「一般」。亦因為咁，佢嘅脾氣一直俾鄰居形容為「冇耐性」﹑「情緒化」之類。
一個入世未深嘅小朋友喺咪真係咁惡劣同貪錢呢？定係仲有其他因素扭曲咗佢嘅人格呢？無可否認， Kirk 磨練多年嘅 Hacking 技術的確係非於常人。不過，作為三億用家所信任嘅平台， Twitter 竟然喺短短幾個鍾入面就面臨咁大危機，由此亦令大家認清 Twitter 帳號安全性同可信度之低。再加上，此事同時都係一個警號 — 現今大家嘅財產都咁依賴科技，危機真係無處不在。今日 Twitter，聽日係咩？冇人知，共勉之。
唔想錯過熱門網絡保安消息，請即訂閱 wepro180 電子周報：https://bit.ly/2ZcCi9J
