【提升防禦力】Google 認證加持 吸引企業採用 DMARC 電郵驗證
經電郵發動嘅攻擊與日俱增，黑客透過假冒發信人地址，或修改信件內容，繞過電郵驗證系統嘅攔截。雖然電郵系統設有 DMARC 驗證機制，但由於設定上比較麻煩，所以採用率偏低。Google 為咗吸引電郵用戶採用 DMARC 技術，而家喺 G Suite 新推出先導計劃，經驗證後嘅用戶可以喺電郵上顯示公司嘅標誌，唔知又有幾多公司會參與呢？
為咗解決電郵造假問題，電郵驗證系統一般都設有 SPF（Sender Policy Framework）以及 DKIM（Domain Keys Identified Mail）兩種方法。SPF 主要用喺防止電郵造假，因為系統會先驗證發送者嘅電郵地址，睇下究竟有無喺寄件伺服器上存在，如果來源伺服器根本無呢個電郵，就好大機會證明係假電郵。DKIM 就用喺驗證電郵內容嘅完整性上，以攔截有可能喺發送過程中被修改嘅電郵。雖然有呢兩個系統把關，但由於有啲舊電郵系統唔支援呢兩種技術，所以有時都焗住要收入信箱。
DMARC（Domain-based Message Authentication,Reporting & Conformance）就係用嚟幫手處理呢類電郵，一旦過唔到其中一關，DMARC 就可以根據預先設定，將電郵分類處理，三種設定分別係 None（照收）、Quarantine（隔離）及 Reject（拒收），等收信者可以減少收到有問題嘅電郵，或對喺 Junk Mail 內嘅電郵提高警覺。而今次 Google 嘅先導計劃，就係只要用戶加入 DMARC 設定，同時將公司嘅 logo 交上 Certificate Authorities Entrust Datacard 及 DigiCert 並通過驗證，Google 就會喺用戶發出嘅電郵上添加公司 logo，增加電郵嘅可信程度，希望提高整個行業嘅電郵安全性。
除咗 Gmail 用戶，Google 亦提升埋線上會議 Meet 嘅安全性，俾 host 有更大權限阻止非法加入會議，以及設定更細緻嘅安全規則。不過由於今次只係先導計劃，所以唔係人人有份，但相信 G Suite 用戶將會陸續收到試用通知。
唔想錯過熱門網絡保安消息，請即訂閱 wepro180 電子周報：https://bit.ly/2ZcCi9J
