【Public Cloud 安全隱憂】全球超七成公共雲企業用家曾遭受過資料洩漏！
好多企業都會選用 public cloud，唔使配置硬體設施，只要支付所需服務同容量嘅費用，就享用到伺服器等級嘅運算資源。雖然方便，不過有調查顯示，public cloud 存在安全隱憂，容易遺失或洩漏數據。根據 Sophos 嘅《2020年雲端安全狀態研究》，過去一年有 70% public cloud 企業用戶曾出現安全漏洞，Security Vendor 更指出亞太地區遭受攻擊嘅比例最高。當大家以為享受緊大企業級嘅雲端服務，其實同樣承受住安全風險，隨時遭受網絡攻擊。
調查由 Vanson Bourne 進行，訪問咗全球 3521 名 IT 經理，每位都至少使用咗一個或以上由以下供應商提供嘅公共雲服務：Amazon Web Services (AWS) 、VMWare Cloud on AWS、Microsoft Azure、Alibaba Cloud、Oracle Cloud、Google Cloud 或 IBM Cloud，當中有 96％ 受訪者擔心用緊嘅 public cloud 安全級別。調查指因系統配置錯誤，攻擊者能夠利用配置錯誤嘅系統或防火牆漏洞，竊取雲端供應商嘅認證，導致 66% 用戶遭受資料外洩。
報告仲指出亞太區最易受到網絡攻擊，有 37% 受訪者遭受過勒索軟件攻擊，印度更係眾多地區入面最易中招地區。新加坡亦不惶多讓，所有新加坡受訪者都表示擔心 cloud 嘅安全狀態，有 71% 人經歷過安全漏洞問題，包括遇到勒索軟件、惡意軟件數據洩漏同帳戶遭到入侵等。總觀全球，歐洲就最安全，由於實施咗 GDPR（通用數據保護條例），當地平均只有 29% 感染過病毒，同 24% 遇過數據洩漏。
受訪嘅 73% 企業會同時選用兩個或以上嘅雲端供應商，不過報告亦同時顯示，原來使用多個供應商，比起只用單一供應商，出現安全事故嘅機率多兩倍。以數據洩漏為例，使用多個供應商嘅事故發生率為 34%，使用單一供應商就只有 14%。
當大家愈嚟愈倚賴 public cloud，但未必每個都清楚自己喺保護 public cloud 數據方面嘅責任，Sophos 的首席研究科學家Chester Wisniewski 就提醒大家：「保護 public cloud 安全係一項共同責任，企業同樣需要仔細管理同監視 public cloud，喺遭受攻擊前已先利一步做好保護。」
唔想錯過熱門網絡保安消息，請即訂閱 wepro180 電子周報：https://bit.ly/2ZcCi9J
