【突發危機】Twitter 名人帳號全軍覆沒，股價大跌超 3%
就喺啱啱，一場大規模網絡騙案震驚全 Twitter。Kanye West﹑Bill Gates﹑Elon Musk﹑ 奧巴馬……一個又一個名人帳號陸續發出「想回饋社會，你畀錢我我雙倍奉還﹗」之類嘅 Post。直到呢一刻，已經有多個帳號以 Bitcoin 方式，將總值十二萬美金以上嘅加密貨幣送畀幕後黑手。
為阻止呢場風波繼續影響更多用家，Twitter 即刻限制大量功能，包括 Direct messaging，用家想改帶有 “Elon”、 “Bill Gates”之類字眼嘅用戶名都唔得。雖然因為快速應對，詐騙嘅擴散速度得到控制；但興此同時，Twitter 作為一個極大型嘅社交平台，竟然可以咁簡單同廣泛地被 Hack，再加上要用咁粗暴嘅手段先可以制止散播，實在令各大用家失望。亦都因為咁，Twitter 嘅股價到呢一刻已經跌咗 3.2%，而仲未有停止嘅跡象。
Bill Gates 嘅發言人更加指出，比起一場普通嘅網絡攻擊，今次事件更加代表 Twitter 上詐騙同平台安全嘅問題。發動攻擊嘅人自稱 Cryptoforhealth, 並由一個叫 Anthony Elias 嘅不明人士建立。Cryptoforhealth 更為自己建立一個 Instagram account， 而入面只係簡單咁寫住：”It was us ” 呢個 hacker 呃人不特止，仲要寸寸槓，真係令人髮指。大家如果唔想俾人笑，就千其唔好貪小便宜，抱住「搏一搏，單車變麾托」嘅僥倖心態去冒險啊﹗
唔想錯過熱門網絡保安消息，請即訂閱 wepro180 電子周報：https://bit.ly/2ZcCi9J
