【以毒攻毒】警方同黑客枱「面」交易，買黑市資料查案？
唔知大家有冇諗過喺黑市購買 Hacker Hack 返嚟嘅資料呢？ 雖然講起呢D資料，大家可能只會諗起社交媒體上嘅個人資料，又或者信用卡，銀行戶口之類。不過，Hacker 會賣嘅野唔只咁少 — 當中就包括有利於警方查案，要用「不法手段」先可以入手，「不法之徒」嘅犯罪證據﹗
日前一間叫 SpyCloud 嘅網路安全公司係網絡研討會上面指出，執法份子可以用黑市資料「以毒攻毒」，加速將罪犯繩之於法。不過呢個舉動，就立即帶嚟大量多方面嘅迴響。
擔任史丹佛網絡及社會安全中心嘅監察及網絡安全副董事 Riana Pfefferkorn 就指出，警方要得到一個人嘅網絡資料，正常要按程序向網絡供稱商提出正式要求，而買資料就等於「走後門」。佢更加認為嗰D程序嘅存在有必要，警方竟然可以直接用公帑非法買通本來屬於大眾市民嘅資料，十分令人不安。
與此同時，美國司法部喺 2018 年出左一份聲明公開感謝 SpyCloud 對管制 DDoS 販賣商嘅幫助。除此之外，全國兒童保護專案組嘅領導 Kevin Metcalf 更加指出，大部份情況下，呢D資料都會提供從未曝光嘅線索。佢認為所有人嘅網上活動都會留下痕跡，所以好快就可以由一個帳戶嘅蛛絲馬跡搵到疑犯。如果所有個案都要經過司法程序，又未必夠資訊量去成立一個個獨立case。佢都補充話，包括黑市資料在內，應該活用所有可以搵出疑犯身份嘅資源。
SpyCloud 嘅 CPO Dave Endler 聲稱，佢所提供俾執法人員嘅資料好大可能早已落入罪犯嘅手中。喺佢眼中，嗰D資料形同「公開」。佢更加講到，除咗幫到追蹤人口販賣之外，仲可以係調查商業同網絡罪案上出一分力。就連對「走後門」有所保留嘅 Pfefferkorn 都不得不承認，使用呢D黑市資料雖然未必合倫理，卻又非常吸引。唔知大家又點睇呢？
唔想錯過熱門網絡保安消息，請即訂閱 wepro180 電子周報： https://bit.ly/3069P4u
