【炒股係咁就好】TrickBot又升值 新技能分析屏幕解像度延長壽命
自 2016 年 9 月首次被黑客用嚟攻擊澳洲銀行同埋金融業客戶，TrickBot 喺短短 4 年間，經過 N 段進化，次數已經超越《龍珠》入面嘅斯路加布歐。每次進化，呢隻 Malware 就更古惑，由起初一隻銀行木馬變成而家嘅萬能 Key，理所當然成為資訊保安平台重點監視對像。今次 N+1 段進化，TrickBot 學識去分辨入侵系統係咪 Virtual Machine （VM），如果係就立即停止運作，隱藏實力阻止研究人員分析戰鬥招數。
單純學識避過監察同分析，使唔使開個 Po 嚟講咁隆重呀？咁先要回顧一下 TrickBot 本身嘅「成就」。呢一刻 TrickBot 最少有 10 款 Module 去偷 OpenSSH 私匙和 OpenVPN 密碼和配置，另外具備橫向感染網絡、瀏覽器上偷個人資料、偷「曲奇」、偷目錄管理服務數據、偷遠端桌面協定、VNC 與 PuTTY 個人資料、鎖屏、連鎖引入其他 Malware 等技能，最出名就係孖住 Ryuk 勒索程式攻陷用家，又有試過轉拍 Emotet，感染力與破壞力已達新冠病毒級。出道 4 年所造成嘅損失難以估計，去年就曾入侵超過 2.5 億個電郵帳號，堪稱當今世上 3 大 Malware 之一。
受聘網絡保安企業 MalwareLab 嘅調查員 Maciej Kotowicz 最近發現，有 TrickBot 開始偵測電腦屏幕解像度，當解像度設定為 800 x 640 或 1024 x 768 時，便會休眠。呢個功能完全針對資安平台研究員以 VM監察 TrickBot 而設，因為為咗節省系統資源，VM 嘅屏幕像素一向 set 得較低，平衡過利弊之後，黑客就寧願放棄呢批 VM，以及真係採用咁低屏幕像素運作嘅系統，以減少俾資安研究員採集攻擊數據嘅風險，令 TrickBot 唔會咁快被攔截。一隻原本已經非常古惑嘅 Malware，依家仲要識得左閃右避，實在令研究團隊更難捕捉。不過曲線咁講，如果你將自己個芒嘅 Resolution 轉到得 1024 x 768，就可以減少受感染嘅風險啦。
相關文章：【成就解鎖】TrickBot再進化 雙重驗證保安失效
