【公測啟動】Microsoft Defender ATP強化Android防禦力
Microsoft 嘅企業向網絡防禦方案 Defender Advanced Threat Protection（ATP）嘅用戶有福喇，事關佢專為 Android 裝置而設嘅 Microsoft Defender ATP for Android，已正式為現有用戶提供公測，企業嘅網絡安全管理員，可以喺 Defender Security Center 嘅 dashboard 上，選擇喺員工嘅 Android 裝置上啟動防禦，大大減少裝置中毒、繼而入侵公司內部網絡或雲端應用嘅風險。
Microsoft Defender ATP for Android 嘅實際功用，其實同一般嘅流動裝置防毒程式差唔多，可以掃描裝置有無被惡意軟件入侵、防止瀏覽帶有惡意軟件或釣魚網站，以及禁止裝置訪問預設嘅網址等等。不過，作為企業嘅防護閘口，Defender ATP for Android 仲可以俾管理員進行更精細嘅裝置權限管理，例如批出存取內部網絡資料權限，或禁止使用某啲應用服務等。
如果大家仲有印象，應該都記得我哋提過，唔少網絡安全調查報告都指出員工帳戶係黑客至愛目標，因為只要攞到其中一個帳戶登入資料，唔單只可以竊取機密，仲有可能配合其他方法入侵，而 Defender ATP for Android 正可有效封鎖呢條渠道，一旦系統發現有某部裝置正進行危險活動，或估計安全風險屬於高危，就會自動將該裝置隔離，禁止訪問 Outlook 或 OneDrive 帳戶，同時將可疑活動匯報去客戶嘅安全中心，等管理員可以進一步調查及作出反應。想知點樣啟用服務，可以去返官網了解。
相關文章：【三星危機】2014年打後推出Android手機 全部可被輕鬆入侵
