【怪談之「林峯」攻擊】燈膽都會做內鬼
黑客入侵手法有幾咁估佢唔到？淨係靠燈膽震動呢一招嚟偷聽對話，就肯定無乜人會諗到；就算諗過吓，都唔信真係得啦！不過，專家宜家話俾你知，呢招真係work㗎！
今次做實驗示範嘅學者，分別來自以色列 Ben-Gurion University 及 Weizmann Institute of Science。佢哋將呢個旁道攻擊（side-channel attack）技術稱之為「林峯」（Lamphone），主要係透過分析燈膽被聲音振動嘅幅度，再用人工智能即時還原成聲音，達成偷聽任務。
唔係啩，燈膽震幅真係睇得到咩？答案又真係得喎，喺今次示範入面，專家就喺一個距離目標會議室25米嘅地方，用一支搭上價值 400 美元電子光學感應器嘅望遠鏡，再將鏡頭讀取到嘅燈膽震動變化傳輸至解讀裝置，成功還原會議室內播放嘅侵侵演說以及 Beatles 嘅「Let It Be」歌曲，後者嘅清晰程度仲足夠俾 Shazam 認出係邊首歌曲嚟添。
留意今次實驗由於只係「單聲道」發聲，並唔存在多人同時講話，所以未必真係咁實用。不過，如果係牽涉到極重要機密，就點都要防範一下，例如唔好再用燈膽、壓低音量、播放背景音樂，甚至拉埋窗簾，先至可以減少被竊聽嘅風險。專家已就今次研究發表「林峰」報告，另外佢哋亦會今年八月舉行嘅黑客大會 Black Hat USA 2020 進一步深入探討，有興趣就要留意喇。 https://www.youtube.com/embed/t32QvpfOHqw?wmode=transparent&rel=0&feature=oembed
相關文章：【餘震】Spearphone 旁路攻擊 Android 手機有加速器即中招
