【IoT 喜訊】Swissbit 推出加密閃存記憶體。改
監控鏡頭、智能恆溫、指紋門鎖、節能控制、感應燈光⋯⋯物聯網（IoT）裝置喺大眾日常生活越發普及，而喺商業層面嘅應用就更廣泛，市場調查公司 Gartner 預測本年全球將有 58 億部 IoT 裝置接通互聯網，但亦因生產成本與欠缺嚴格安全守則指引，衍生無限網絡安全漏洞。防毒軟件供應商 Kaspersky 表示喺 2019 年首 6 個月中，錄得一億次針對 IoT 嘅攻擊，比去年同期飆升 9 倍，傳輸數據嘅安全設定係其中一個漏洞所在。針對呢一個環節，閃存記憶體生產商 Swissbit 早已推出附有加密程式嘅 SD 與 mircoSD 卡，供手機與警務人員 Bodycam 所採用。最近品牌更擺脫「卡」呢個柜架，向更多 IoT 產品提供加密閃存記憶體，其中一個例子就係德國收銀機。
德國近年成立法案，要求全國所有收銀機必須配備認證 TSE（Technical Security Equipment），確保收銀機嘅交易數據無法竄改，時限一年。不過現行收銀機唔一定有 SD 或 microSD 卡插槽，USB TSE 就應運而生，3 個媒介基本上涵蓋所有現役收銀機，商家毋須為此更換裝置。除此之外，只要喺 TSE 裝置加添感應器、無線傳輸晶片與天線，就可擴充 M2M 嘅無線傳輸數據功能，打破新舊裝置代溝，同時確保傳輸過程得到加密保障。呢個轉變亦正好迎合去中央化資訊處理嘅潮流，因為企喺黑客立場，與其強攻防守嚴密嘅數據中心、自動導航汽車、智能醫療器材、通訊設備等電子裝置所儲存嘅資訊，相對低設防嘅裝置，下手價值更高。
除咗智能化生產線、AI 管理等，工業革命 4.0 嘅重點之一就係 IoT 數據傳輸網絡，針對去中央化數據帶來嘅網絡安全漏洞，Swissbit 為每個閃存記憶體加入防偽冒 ID，配合加密傳輸等措施，確保 M2M 過程得到認證，IoT 個體數據庫亦得到保護，或者可以堵截如 2015 年 Jeep SUV 嘅 Firmware Update 被入侵後可隨意操縱加減速、Owlet WiFi 嬰兒心跳監測器被入侵後被操控讀數等情況再次出現。
而喺德國嘅周邊國家如英國及澳洲，亦就 IoT 產品推出生產守則，建議生產商必須就 13 方面去減少安全漏洞。當中有三方面更被視為最重要嘅守則，分別係：1. 唔使用相同密碼；2. 加入漏洞公布政策，當收到舉報後要作出即時回應； 3. 提供檔案更新，等用家有方法堵塞漏洞。作為 IoT 生產商，要多啲留意呢方面嘅規定呀。
