【立即變臉】Facebook窩心功能 管理舊Posts又快又輕鬆
絕大部分人都會用社交平台，所以有時企業喺請人前，都會去求職者嘅帳戶，去了解多啲對方平時嘅行為，再決定係咪聘用。為咗應對呢啲招數，有人會開個假account，但間唔中都要出吓嘢；亦有人會為社交平台大清洗，去打造一個假嘅自己，不過其中港人比較熱愛嘅Facebook，喺刪除舊Posts嗰陣要逐條搞，如果要刪除好舊嘅Posts就更加嘥時間去scroll落底，一個唔好彩㩒錯掣，隨時仲要重新再scroll過添！有時真係成個account刪除仲簡單。
為咗方便用家清洗舊Posts，Facebook新推出 Manage Activity 功能，只要喺個人版面度揀「活動記錄（Activity Log）」，就可以搵到「管理動態（Manage Activity）」選項，之後一次過點選晒所有要處理嘅Posts，跟手就可以決定要封存（archive）定係刪除（delete)佢哋。封存會幫你收埋晒點選咗嘅Posts，日後仲搵得返，而刪除就會打包放晒入垃圾桶，喺30日冷靜期過去後都無救返出嚟，就會永遠消失㗎喇。最窩心嘅功能，係設有Filter俾大家搵返指定時間、用戶嘅Posts，唔使大家撥屏幕撥到手軟。
呢個管理功能暫時只係開放俾手機 app 使用，但 Facebook 方面就話網頁版亦會好快推出，如果有嘢要趕住清，就快啲去更新 Facebook 嘅手機 app 喇。
相關文章：【詐騙風險升溫】1/3港人Facebook帳戶資料外洩
