【移民潮】暗網託管網站服務資料外洩 被捕風險升溫
為咗避過被執法部門或敵對單位追蹤，唔少人會透過暗網（Dark Web）進行各種違法交易或傳遞機密訊息，呢啲人包括形形式式嘅罪犯、政治人物、傳媒等。一旦暗網嘅機密外洩，或俾執法部門攞到，唔難想像，參與其中嘅人都肯定會驚餐死。而早前威脅情報公司 Under the Beach 就發表報告，指出專門為暗網服務網站提供免費託管嘅供應商 Daniel’s Hosting，就喺今年三月被黑客入侵，偷走咗一堆資料，結果導致 7600 個暗網網站被取締，而Daniel’s Hosting 亦即時停止服務，並呼籲客戶快啲將業務或其他機密工作轉移去新嘅暗網。
根據報告顯示，今次外洩嘅資料包括 3,671 個電郵地址、7,205 個密碼，以及 8,850 條同託管網站有關嘅私鑰。專家就話憑住呢批資料，執法部門可以追蹤到相關網站持有人身份，同埋佢哋做過啲乜嘢違法事件。而策劃呢次入侵行動嘅黑客，據指係來自 Anonymous 黑客集團嘅 KingNull。至於點解要攻擊 Daniel’s Hosting，專家就話唔係一件難以想像嘅事，因為 Anonymous 集團曾經喺 2013 年發動 Operation Darknet 反兒童色情照行動，針對當時最大嘅 TOR 洋蔥網絡託管商 Freedom Hosting 發動攻擊，唔係第一次睇住暗網嚟打。
其實暗網出事嘅新聞經常發生，好似上年全球第二大暗網交易平台華爾街市場（Wall Street Market）被歐美警方聯手搗破，就係因為另一個暗網交易平台 Silkkitie 被芬蘭海關封鋪所引發嘅連鎖效應，而暗網上嘅資料落入執法部門手上之後，參與過嘅罪犯自然好擔心會被掌握犯罪證據及被捕。所以話，雖然暗網一般都係採用 TOR 洋蔥網絡嚟隱身，但只要當中嘅資料外洩，一樣無所遁形。而最重要嘅一點係，Daniel’s Hosting 都呼籲客戶改晒相關帳戶嘅密碼，因為如果採用相同嘅密碼，其他帳戶就有可能被入侵埋，呢樣嘢雖然好多安全專家都會講，但由暗網嘅參與者講出嚟，絕對有說服力得多啦！
相關文章：【攬炒】 華爾街市場 人人自危 歐美聯手搗破第二大暗網
