【捲土重來】 Google Authenticator 3年嚟首次重大更新 到底改咗啲乜？
登入 IG 或Google 帳戶時，如果有設定雙重因素認證(2FA）嘅話，相信對 Google Authenticator 一啲都唔陌生。呢個 app 可以為已連結嘅網上帳戶產生一個驗證碼，通常係一組六位數字，用戶登入帳戶時要喺限時內輸入驗證碼，否則驗證碼就會失效，需要重新再產生一組數字。
不過同類嘅 app 好似 Authy 或 Microsoft Authenticator，都容許多部裝置共用同一個帳戶，即係如果你要登入一個啟用咗雙重因素驗證嘅網上帳戶，都唔會限定你用死一部手機，只要喺女相關裝置上安裝呢啲 app 再登入返你個帳戶就得。不過，舊版嘅 Google Authenticator 就非常之唔user friendly，如果你要轉去新裝置，就要逐個網上帳戶重新綁定，一兩個都係小事，如果你有十個已綁定嘅帳戶，而你部電話一個唔小心出事嘅話，贈你四隻字：「嗚呼哀哉！」
自 2017 年以嚟就無再更新過嘅 Google Authenticator，今次終於都洗心革面，迎嚟5.10版本更新，當中唔少得嘅就梗係加入裝置之間嘅帳戶轉移，用戶唔需要再喺舊裝置逐個帳戶解除，然後喺新裝置重新連結，新版本新增咗轉移模式，用戶可以喺舊裝置打開 QR Code，再用新裝置掃一下就可以完成轉移（詳細方法可參考呢度）。雖然唔係咩大發明，不過至少令呢隻app唔再落後，有返值得使用嘅價值，有用家都即刻留言話：「終於可以轉移手機！」
難得更新一次，又豈止於此？新版嘅介面亦有改動，主要採用咗 Material Design 2.0 設計，字型同版面編排望落都靚仔啲，而且終於提供「真‧黑色模式」，等 OLED 屏幕裝置更加慳電，係雞毛蒜皮咗啲，不過都叫做有多啲嘢改善咗，受唔受就見仁見智啦。
新版 Google Authenticator 已經開始陸續提醒 Android 裝置使用者更新，Android用家當然可以即刻上Google Play睇下有無份啦，唔係嘅話就等多排，至於 iOS 用戶呢，官方就未有更新消息，等唔切嘅話，都係考慮用住其他雙重驗證方法先啦。
相關文章：【手快快出禍】唔睇使用條款 突破 2FA 雙重驗證話咁易
