【漆黑中嘅螢火蟲】抗智能辨識T恤 電眼認唔到人眼實睇到
愈嚟愈多 CCTV 引入智能辨識技術，而且辨識率高，速度又快，令唔少人都擔心自己嘅個人私隱存在風險。的而且確，生物特徵唔係話改就改，如果採集嘅機構外洩咗你嘅私隱，一旦落入罪犯手上，就有可能用嚟進入一啲你用生物特徵做驗證嘅帳戶，包括你部手機、銀行戶口等等，最慘係除非你整容、更換指紋，否則你係改唔到外洩咗嘅生物特徵，所以千祈唔好以為唔關你事。
既然有人唔想俾 CCTV 認出，自然有人諗辦法破解。來自美國東北大學、麻省理工同埋 IBM 嘅研究員，就合作研究咗一款專門用嚟對付智能辨識技術嘅 T 恤出嚟，呢件 T 恤嘅特別之處，唔係有連身面罩俾你遮樣，而係透過衫上嘅萬花筒 pattern，干擾辨識系統嘅神經網絡（Neural Network），令到系統將你判斷為「非人」或其他物件，咁就唔會被記錄在案，難以被事後搜索返出嚟。
今次團隊用嚟研究嘅神經網絡，主要係專門用嚟做智能辨識訓練嘅 YOLOv2 及 Faster R-CNN，而團隊就要搵出有乜嘢「圖案」可以用嚟干擾辨識。相比起干擾靜態圖像辨識技術，團隊話今次難度高好多，因為 CCTV 係會連續記錄動態畫面，所以必須確保衫上嘅圖像係活動情況下，都可以持續咁「隱身」。研究員於是就諗到用類似製作 3D 動作嘅方法，記錄及分析人類行走時衫身摺疊嘅動態，再因應擺動幅度將圖案印上去，結果將成功喺 YOLOv2 及 Faster R-CNN 下嘅隱身率，分別由 27% 及 11%，大幅提升至 63% 及 52%。雖然距離成功仲有一大段距離，但至少都有一半成功率。
事實上，團隊澄清今次研究唔係為咗對付智能辨識系統而估，反而係希望搵到系統有乜不足，先可以再強化佢哋嘅能力。之不過，睇完呢件 T 恤嘅 pattern，大家都應該明白著嚟都嘥氣，因為咁獨特嘅設計，即時令著衫嘅人變成漆黑中嘅螢火蟲，智能辨識認你唔到啫，人眼都一定搵得返你出嚟啦！
相關文章：【一念地獄】 澳洲試行人臉辨識 學者評價「完全失敗」
