【開戶好幫手】Firefox Private Relay助製假地址

而家要網購或登記使用免費應用服務，九成網站都需要用家登記成為會員，以提供更個人化資訊，同埋最緊要喺搜集你嘅私隱資料。雖然好多人都會喺 Gmail 或其他免費電郵平台開一個帳戶，專門用嚟接收帳戶確認電郵或其他資訊電郵，但管理上嚟就比較麻煩，成日要喺帳戶之間切嚟切去。識得玩嘅話，可能會喺「假帳戶」度 set 返自動轉寄電郵去常用帳戶，不過大前提係電郵服務供應商支援呢種功能，就算支援，用家都要額外做設定，所以唔係咁多人會搞。

較著重協助用家網上隱身嘅 Mozilla，而家就測試緊一項轉寄服務 Firefox Private Relay，只要安裝喺 Firefox 瀏覽器上，然後填返自己常用電郵等資料，系統就會自動幫用家製作一個統一嘅假電郵地址，當下次要開戶或訂閱某啲服務，用家就可以用呢個假電郵嚟登記，一旦 Private Relay 收到開戶確認信或其他推廣電郵，會自動轉寄去你個真地址，如果你覺得唔想再收到對方嘅垃圾電郵，一 click 就可以取消，方便至極！

其實唔用個人電郵嚟開戶，最大好處係減少私隱外洩，只要睇返而家幾乎日日都有服務供應商洩漏客戶資料嘅新聞，就知私隱外洩好多時都唔關當事人事，而係出喺服務供應商上，所以唔用真電郵地址登記，就減少到私隱被利用嘅風險。最重要係，相信唔少人喺處理唔同帳戶時，都傾向用返相同密碼，而 Firefox Private Relay 自動製作出嚟嘅電郵地址，係唔會同用家嘅身份有任何聯繫，就算外洩，都唔怕黑客可以用呢個密碼嚟嘗試登入其他用真電郵登記嘅帳戶啦！

Mozilla 嘅網誌上講明 Firefox Private Relay 嘅用法會非常簡單，唔使用家做麻煩嘅轉寄設定。很想要吧？可惜暫時呢個功能仲係私人測試中，要收到邀請先用到，完成版會喺今年內推出。不過大家都可以裝咗呢個 Add-ons 先，話唔定有機會搶先試喎！

資料來源：https://relay.firefox.com/

相關文章：【下載保平安】iOS 13 更新未出先興奮 三招守護個人私隱