【黑科技】小米、薄荷更新後繼續上傳瀏覽器資訊
上星期，小米被 Forbes 踢爆旗下嘅 Mi 及 Mint 瀏覽器，會自動採集用家嘅搜尋記錄、瀏覽網頁習慣、設定資料，同時傳送去位於中國及俄羅斯嘅 Alibaba 伺服器，而且就算你開咗 Incognito 隱身模式都無用。雖然小米回應話呢啲資料會係集中處理，唔會可以用嚟追蹤返用家本人，但有安全專家就話搜集嘅資料包括咗用家嘅 UUID，只要經過過濾，基本上可以抽返晒同一 UUID 嘅記錄出嚟睇，同追蹤個人用戶嘅私隱無太大分別。 https://www.youtube.com/embed/1GdKvvG3zoY?wmode=transparent&rel=0&feature=oembed
受影響嘅包括小米手機用家，以及安裝咗 Mi 或 Mint 瀏覽器嘅用家，為咗安撫用家及平息疑慮，小米方面好快為瀏覽器推出咗更新版本，不過，唔好以為更新咗就無事，因為系統依然預設 Incognito 模式下會傳送上述數據返中國同俄羅斯伺服器，用家必須手動進入瀏覽器嘅設定版面，喺 Incognito mode 內取消 Enhanced incognito mode 選項，先可以嗌停上傳功能。至於一般模式，就更加無提供呢個選項添！
