【搶收視】ICEBUCKET機械人代睇廣告服務
俾錢賣廣告，梗係想推廣嘅內容可以俾潛在客戶睇到啦！但如果睇嗰個只係機械人嚟，甚至根本只係假扮睇咗，咁呢筆廣告費就使得好冤枉喇。偏偏宜家就有黑客利用推播網上廣告片嘅漏洞嚟呃錢，仲要高峰期有一半睇廣告嘅要求都係假嘅，係咪好慘先！
根據專門偵測殭屍網絡嘅安全機構 White Ops 發表嘅報告，過去數月佢哋發現有黑客正進行大型廣告詐騙行動，黑客會用程式假扮成唔同嘅 Smart TV 裝置， 然後向負責派送網絡廣告短片嘅 SSAI（Server-Side Ad Insertion）裝置發出播放廣告要求，從而令到播放呢啲廣告嘅 App 開發者賺到錢，但實際上呢啲廣告只係由機械人睇咗，或向 SSAI 發出「已閱」訊息。White Ops 研究員將呢次行動定名為 ICEBUCKET，並認為係同類型行動入面規模最大嘅一次。以今年一月最高峰嘅一次事件為例，單日就錄得 19 億次虛假廣告播放要求；而為咗成功呃到 SSAI，黑客亦出動咗 200 萬個虛假 IP address、模擬過千種播放裝置添！
其實網絡廣告唔一定要智能電視裝置先睇得，不過由於現時支付俾喺智能電視上播放嘅廣告費用會較手機、電腦高，所以根據佢哋調查所得，黑客會主力模倣成呢啲裝置，例如今次行動有 46% 偽裝成 Roku 串流播放器，另外有 26.8% 扮成 Samsung Tizen 電視及 20.7% 扮成 Google TV。
White Ops 方面話現時仲未清楚ICEBUCKET 背後嘅黑客組織真身，同時亦唔知 300 個用嚟播放廣告嘅 app ID 係咪全部都由佢哋操控，研究員話有可能黑客組織正為 app 開發商提供詐騙 as a Service 服務，所以預計呢類廣告詐騙將會愈嚟愈多，相信都要提升一下 SSAI 嘅驗證裝置機制喇。
