【疫向轉變】新冠病毒七大生活對策
疫情下，全球有過億人在家工作。缺乏企業網絡保安的防護罩，黑客瘋狂出動獵食，Mac 用戶使用 Zoom 時視像鏡頭與咪更容易被黑客入侵就是例子。SiteLock 銷售總監 Logan Kipp 與 Alnormal Security 網絡保安策略副主席 Ken Liao 總結疫情下嘅新生活模式，得出以下六種漏洞與對策，值得大家開心 Share。
網購
網購燒錢本身已經係 WFH 模式下最易出事，但缺乏網絡保安意識嘅話，會有進一步嘅金錢損失。
* 盡量喺 iTunes App Store 或 Google Play 下載嘅 deliveroo、Food Panda 和 UberEat 叫外賣，對比網頁版本無咁容易外洩個人資料。
* 要小心以口罩、搓手液、廁紙等搶手物資為餌嘅「推廣電郵」，唔小心被惡意程式入侵外，亦有好大機會收假貨或收唔到貨。為保障大家，見到想買嘅產品時，請不厭其煩去返官方網站，查閱銷售詳情，透過官網下訂單。
* 網購基礎：最好選購相熟網店產品，收到陌生電郵，第一個反應係問下點解佢有你 Email Address 而唔係睇佢有咩優惠。
視像會議
兩個月時間用戶人數由 1 千萬急升至 2 億嘅 Zoom，最近因用戶資料儲存中國伺服器及一系列資安漏洞，掀起大眾關注。
* 喺堵塞保安漏洞前，不建議企業、非牟利團體和學校使用 Zoom。無傷大雅嘅家庭或興趣小組可以繼續用，但切密談論稅務或遺產。
* 企業可考慮 GoToMeeting、Microsoft Teams、Cisco WebEx 等取代 Zoom。
* 如非 Zoom 不可，請設立 Meeting ID 加密方式，將會議邀請連結與密碼 DM 與會者。切忌不設防將會議邀請連結放係公海，俾任何動機不良者有機可乘。
* 小提示，視像鏡頭燈關閉不代表鏡頭完全停止運作，facebook 老闆教落，唔用時最好搵嘢遮一遮。
社交平台
疫情期間，大家多咗時間上社交平台，雞丁出片都頻密過以前。專家關注嘅，係社交平台衍生嘅通訊保安漏洞。
* 由於設立一個帳戶嘅成本太低，呢啲平台已經成為惡意程式流傳嘅高危地區。即使你識嘅人傳送訊息，特別係工作夥伴，最好以其他途徑確認訊息真偽。
* 大家都知 Follower 唔等如 Friend，更莫講朋友都有好多層次。有不少人已經趁疫情得閒大掃除，清理一下追蹤者名單。專家建議用群組分類，控制留言，同時切勿發布住址、身份證明、健康狀況等個人資訊，最好病咗都唔好呃 Like。
網上課堂
疫情之下，在家工作嘅家長變相打兩份工，白交托兒果部份嘅學費。兩邊忙嘅情況下，仲要擔心仔女濫用上網器材。未有時間學分身嘅家長，可選擇智能式監控。電視、電腦、平板電腦、遊戲機、手機等通通都有家長設定使用限制，如限制使用時間或只限指定程式；路由器亦有內容過濾選項，可設定白名單與黑名單。
視像問診
基於風險，醫療機構正積極運用視像問診方式，讓輕症或非逼切病人，喺保持社交距離下得到初步專業意見，減低醫療機構負擔。即使疫情過後，呢種問診方式相信會越來越普及。個人健康資料隨時比個人身份資料更有「利用價值」，沒有預約下，必須慎重確認由醫療機構主動發出嘅視像邀請，最佳方式係親自聯絡醫療機構，預約視像問診，並確認醫生資料，問診時再做確認。
Netflix Party
唔可以約埋睇戲煲劇嘅日子，有人開發咗 Chrome Extension 嘅 Netflix Party，等大家保持社交距離下同時煲劇，實時討論劇情。Fire TV 用家可以直接於電視上開 Netflix Party，而上得網嘅電視／電器，都要承擔保安風險。專家提醒大家一定要更新 Firmware，除蟲之外，有時都會提升網絡保安。如果電視使用有線嘅 Adapter，就要保持更新，以防感染電視。
