【視像色情會議】南非女外長開ZOOM 慘被黑客插播甜片

因為疫情嘅關係，視像會議程式突然變到人人都要識用咁滯，南非外交部長馬沙巴內夫人亦唔例外，早排佢本來要就新冠病毒嘅影響，用Zoom主持一個部門嘅視像會議，不過事與願違，呢個會議最終俾黑客入侵，仲要播埋色情內容，場面令人尷尬。

最慘會議上除咗有部門員工同傳媒之外，為咗提升參與度，會議直情開放俾公眾加入，有意參加嘅人超過400個，相信黑客扮成參與者混入會議，喺眾目睽睽之下播放裸露圖片同色情畫面。

隨住視像會議程式嘅需求愈嚟愈大，相關嘅網絡安全問題亦都成為熱話，美國聯邦調查局(FBI)都點名話，Zoom程式有明顯嘅安全漏洞，已經成為黑客目標，更加指出兩宗黑客成功入侵嘅例子：馬薩諸塞州一間高中用Zoom上堂期間，就俾不明來歷嘅入侵者大聲講粗言穢語，同埋公然講出負責老師嘅住址；州內另一間學校就有入侵者喺鏡頭面前，向與會者展示納粹德軍標誌紋身。FBI提醒市民用Zoom或者同類軟件嘅時候，要確保軟件已經更新到最新版本，亦唔好隨便公布同透露進入網路會議室或網路教室嘅連結。

除此之外，加拿大多倫多大學有份參與嘅研究機構Citizen Lab，早前就揭發Zoom有時會用中國伺服器（servers）供應商發出嘅密鑰（keys），就算係北美客戶嘅 Zoom 會議，都可能用咗嚟自中國嘅密鑰。報告質疑Zoom喺中國有三間公司，有可能令 Zoom面對官方壓力嘅時候，有法律責任要披露加密資料。而Zoom亦喺4月3日承認，因為2月用戶流量急升，誤將幾千個用戶嘅會議流量，分流咗去中國兩個數據中心處理，Zoom無透露受影響用戶有幾多，雖然強調已經盡快修補漏洞，不過事件已經令大眾對Zoom嘅安全性存有戒心。

唔少用戶亦都開始尋求Zoom程式以外嘅選擇，包括：Google Hangouts Meet、Microsoft Teams、Cisco WebEx 、又或者係Skype嘅會議功能，經常有需要開視像會議嘅朋友，不妨了解多啲。

資料來源：https://bit.ly/34KXc0R、https://bit.ly/2ymH9Kz、https://bit.ly/3eutbH7

相關文章：【緊急自救】修改群組政策設定 煞停Zoom 派送Windows登入密碼