【網絡通俄門？】Google都中招 全球逾200個CDN疑被俄國ISP劫持
喺啱啱上個禮拜，全球超過200個主要嘅內容傳遞網路(CDN)，發生咗邊界閘道器協定（Border Gateway Protocol,BGP）劫持事件，Google、Facebook等多個雲端或 CDN服務嘅數據流量，全部都被引導去俄羅斯一個 ISP─Rostelecom。
受影響嘅網路流量路由超過8800個，持續咗一個鐘左右，好多更加係大型嘅 CDN 同雲端網站，包括Google、Amazon、Facebook、Akamai、Cloudflare，以及 Line都中招。（詳細清單）
大多數 ISP 都係經 BGP 嚟同其他 ISP 建立路由連接，所以 BGP 劫持亦可當成 IP 劫持。由於 BGP 缺乏安全設計，黑客可以將 Facebook 位址改為其他 IP 位址，將流量引導過去，而其他 ISP 亦喺無核實情況下將新嘅 Facebook IP 位址散播開去，結果受影響嘅用戶就以幾何級數增加。
喺未用 HTTPS 加密通道傳輸之前，BGP 劫持通常令黑客可以攔截流量，發動中間人（Man-in-the-Middle，MitM）攻擊繼而竊取重要資料，不過就算今時今日大部分流量都改用 HTTPS 傳輸，其實黑客都可以保存資料，留返日後破解技術提升後才慢慢睇。
今次 BGP 劫持係近三年內第三次發生嘅大規模流量誤導事件。喺 2017 年 12 月，Google、蘋果、Facebook、Microsoft 等多間公司嘅網路流量，就曾經一度被導向俄羅斯、挪威、丹麥、澳洲等多個地方；2018 年 11 月，一間尼日利亞小型 ISP 公司就曾經做錯設定定，將 Google 流量導引去中國電信，令外界一度質疑 Google 流量被挾持；2019 年 6 月，歐洲出現大量手機流量傳向中國電信，時間更長達兩個幾鐘。
今次事件係由 BGP 流量監控商 BGPmon 所發現，BGPMon 創辦人 Andree Toonk 指出，相信事件只係 Rostelecom 唔小心誤將新嘅 BGP 路由公布咗去公眾網絡而導致，基於「疑點利益歸於被告」，所以評論今次事件只係意外，過往亦有好多網絡專家指出，好多時BGP劫持其實只係「意外」，而且同刻意劫持好難區分。
