【唔好漏咗佢】小裝置 阻家居智能管家偷聽會議內容
喺 WFH 模式下，近排好多人都好關注 Zoom 視像會議應用工具嘅安全性，美國 FBI 警告大家最近有好多黑客以 Zoom-bombing 或 Video-teleconferencing hijacking 攻擊嘗試潛入會議，有研究員又發現 Zoom 嘅設計存在 UNC Link 漏洞令與會人士有外洩登入資料風險。為咗加強本地企業嘅安全性，香港電腦保安事故協調中心（HKCERT）就喺 blog 上，羅列出一系列安全注意事項俾大家參考。咁多人發聲，都係擔心機密會議內容會被竊睇竊聽；之不過，Home Office 嘅大家好似漏咗一樣嘢喎，咪就係屋企用緊嘅智能管家囉！
對於鍾意試新嘢，例如 smart home 嘅人嚟講，Google Home、Amazon Echo 呢類智能管家又點走得甩？不過，其實唔少人都對呢類智能管家存有疑慮，擔心佢哋平時會唔會偷聽緊自己嘅對話？事實上，唔少智能管家都曾經被發現漏洞，可以俾黑客入侵偷聽用家嘅說話，所以如果大家喺屋企進行視像會議，都有必要考慮係咪應該熄咗佢先？外國就有生產商出咗個小裝置 Paranoid，只要你安裝喺智能管家之上，佢就可以幫你暫時性「整聾」智能管家，直至你用語音指令嗌 Paranoid 「休息」，之後就可以同智能管家正常溝通。無錯，聽落係幾搞笑，用語音指令啟動另一個裝置嘅語音指令功能，但就唔使次次走埋去開熄呢個小裝置囉。
Paranoid 分有兩個版本，Home Button 主要針對有實體靜音掣嘅智能管家，Home Wave 就唔需要有實體掣，只要你嗌著佢，佢就會發出聲頻干擾智能管家聽聲。另外用家亦可以寄自己嘅智能管家俾廠商改裝，令收音咪必須先通過 Paranoid 裝置先再去到智能管家上，咁就更有保障。又會有人問，咁我點信得過 Paranoid 唔會偷聽呢？大家又可以放心，因為 Paranoid 完全係一個封閉裝置，佢本身唔會連上互聯網，亦唔會有 Wi-Fi 或藍牙傳輸功能，所以唔可以將你嘅對話發送出去㗎。
其實 Paranoid 嘅出現，都喚醒咗大家應該小心處理屋企嘅 IoT 裝置，除咗智能管理，其他可以聽聲同錄影嘅裝置仲有智能電視、CCTV、吸塵機械人等等，所以如果講嘅內容真係好機密，真係建議大家要完全熄咗佢先好啲。
相關文章：【竊聽風暴】Google、Amazon智能喇叭偷錄密碼
