【破解算法】微軟殲滅全球最大殭屍網絡Necurs
今次微軟認真叻叻豬！佢哋啱啱宣佈，成功同多國警方以及來自 35 個國家嘅私營機構，夾手夾腳消滅咗全球最大殭屍網路 Necurs。Necurs 呢隻嘢近年好紅，佢厲害嘅地方係一旦電腦被感染，就會不停傳送垃圾電郵俾人，2017 年就試過以每小時 500 萬封電郵嘅速度，係咁將 Dridex 同埋 Locky 兩隻勒索程式傳送出去，一炮而紅！
多年嚟資安界對 Necurs 可以話係冇晒符，由2016 到 2019 年期間，9 成由電郵傳送嘅病毒程式都係透過 Necurs 傳出去嘅，微軟就做過一個實驗，觀察一部中咗 Necurs 嘅電腦 58 日，結果部電腦自動傳送咗 380 萬封垃圾郵件，好得人驚！而且 Necurs 為咗方便做嘢，仲會整停電腦入面包括防火牆等嘅保安程式，兼且會不停靠演算法產生新網域，要阻止佢可以話係好難！
咁微軟係點做到嘅呢？首先就要了解吓 Necurs 點運作。當佢感染咗電腦後，就會同黑客嘅 C&C 伺服器聯繫，執行下載惡意程式或其他指令，為咗避免網絡安全專家追蹤到 C&C 伺服器嘅位置，Necurs 內置一套 Domain Generation Algorithm，通過演算法產生新嘅網絡位址，令 C&C 伺服器可以定期更換去唔同地方。而微軟專家就因為破解到 Necurs 套演算法，成功計算出未來 25 個月 Necurs 有可能產生出嚟嘅 600 萬個新位址，然後通知世界各地嘅網域登記組織，率先封鎖呢堆位址，阻止 Necurs 繼續作惡，然後再將現有中咗 Necurs 嘅網絡逐一消滅，搞咗好多年先成功瓦解到 Necurs，真係功德無量！希望今次打撃成功，網絡上嘅垃圾電郵可以大幅度減少，你同我再唔會收到「有美女想同你約會」嘅電郵啦！
相關文章：【請槍】受僱型 DDoS 攻擊捲土重來 智能手機成殭屍網絡主力
