【不可逆轉？】名為「51%攻擊」成功再造加密貨幣假帳
加密貨幣（Cryptocurrency）採用區塊鏈（Blockchain）技術，分散式帳本大大提升造假帳嘅難度，安全程度甚至被譽為牢不可破。不過，其中一隻加密貨幣 bitcoin gold（BTG） 最近又被黑客成功造假數，呃咗約 7.2萬美元，仲要係兩年內再度出事，乜嘢叫做不可竄改？Are they a joke to you？
除咗 BTG，其實已有唔少加密貨幣出過事，好似 Verge、Monacoin、Ethereum Classic 等等。又話區塊鏈技術不可竄改，咁到底發生乜嘢事？原來要篡改加密貨幣並唔係完全無可能，只要黑客控制到呢隻加密貨幣喺整個網絡上嘅51%運算能力（Hash rate,哈希率），就可以將新挖出嘅貨幣隱藏唔廣播，然後迅速將貨幣喺市場上出售及提取資金，跟住先將挖出嘅貨幣廣播等其他節點驗證，咁黑客就可以成功擁有呢個貨幣之餘，之前嘅交易亦會被視為無效但錢已攞，達成Double Spending雙重支出攻擊。由於黑客要攞到 51% 嘅演算能力去控制「賽果」，所以除咗叫做 51%攻擊，亦可以叫做多數派攻擊（majority attack）。
既然可以控制，咁加密貨幣仲點可以稱得上安全？其實關鍵在於呢隻加密貨幣嘅市值大細。因為挖礦要嘅資源好大，市值愈大嘅加密貨幣例如比特幣，參與挖礦嘅人數多，要控制 51% 演算能力，投入嘅資金就難以計算，就算真係攞到 51% 演算能力，呃返嚟嘅錢都未必足夠填數。而今次出事嘅 bitcoin gold 就屬於低市值，而佢採用嘅ZHash演算法如果用GPU去計算係特別有利，根據專家估計今次攻擊，黑客只須投入約 3400 美元去租 GPU 設備，就足以達成目標，如計埋挖礦所得返嚟嘅 BTG，收入都唔係 7.2 萬美元咁少，值搏率認真高。
有人質疑點解呢啲低市值加密貨幣咁大風險，都仲有交易所肯承擔呢啲風險？其實咪又係計過條數，發現賺取嘅交易費用，比起出事後交易所嘅損失多好多，先至繼續俾佢哋買賣。所以如果大家打算投資加密貨幣，就要揀啲市值高多人參與挖礦嘅嚟買喇。
