【同枱食飯？不了】無聲指令 哄騙語音助手洩私隱
唔少人去餐廳或 cafe 嗰陣，都習慣將手機放喺枱面，方便隨時檢查下有無短訊或接聽來電。而為咗私隱問題，通常都會將屏幕朝下，咁就唔怕其他人（特別係另一半）睇到自己同邊個傳緊短訊，甚至係訊息內容啦！不過，有網絡安全專家指出如果手機啟動咗語音助手功能，放喺枱面呢個行為已足夠俾有心人奪取你部手機嘅控制權，暗中讀取你嘅私隱，最驚係可以用你部電話打俾其他人傾偈，而你係完全唔會發現㗎！
發現呢個漏洞嘅研究員，係來自華盛頓大學電腦科學及工程嘅 Ning Zhang，佢稱為 Surfing Attack 所利用嘅方法，其實只係人耳聽唔到，但手機收音咪就接收到嘅高頻音效，於是就可以暗中向手機嘅語音助手發出指令，例如讀取剛收到內有雙重因素認證（2FA）碼嘅訊息、甚至係用你部手機打電話同人傾偈添。研究員試用過市面上 17 部智能電話，包括 iOS 陣營嘅 iPhone，以及 Android 陣營嘅 Samsung Galaxy 等等，佢話只要將手機放喺枱面，無論將枱用金屬、玻璃、木作為材料，甚至喺 30呎外，都一樣可以通過枱作為媒介，將高頻音效傳送過去，而且正面或反面咁擺，都完全無問題，不過屏幕朝下就更難察覺手機運作緊咁解。 https://www.youtube.com/embed/pQw2zRAqVnI?wmode=transparent&rel=0&feature=oembed
Ning Zhang 亦拍咗片示範成個攻擊流程，首先佢會發出「無聲」語音指令，將手機音效調低，令機主唔為意手機喺度發出各種運作音效。之後，佢就命令語音助手讀出手機剛收到嘅 2FA 碼，並用收音器遙距接收返手機發出嘅音效。即係如果黑客已預先知道你登入銀行服務嘅名同密碼，就可以用呢招嚟偷埋你個 2FA 登入碼添。更得人驚嘅係，黑客仲可以用你部手機打俾 phonebook 上任何一個聯絡人，當住你面暗中同你朋友傾電話，如果把聲模倣得似模似樣，相信要氹你同事講出公司帳戶嘅登入碼，又或叫朋友過數或買點數卡，都唔會太難喇。
要避免被黑客利用高頻音效漏洞，Ning Zhang 話可以由兩方面入手，首先係手機生產商可以加入分析系統，區分高頻音效同真人發聲嘅分別，或改變收音咪擺位。而個人用戶方面，最好就唔好將手機擺喺枱面，就算要擺，都要放喺有吸音、減震功能嘅枱布上面呀！
相關文章：【Demo180】物理斷網都 Hack 到！高手示範 Air-Gap Hacking
