【聽力障礙】智能喇叭每日聽錯19次指令
唔少人都有用過語音助手，例如 iOS 嘅 Siri，又或唔同品牌嘅智能喇叭，而相信絕大部分人都有相信經歷，就係語音助手會失驚無神跳出嚟，有時仲會自動解答一啲你無問過嘅問題，認真令人費解。有美國大學就做咗一個為期半年嘅測試，了解一下呢啲智能語音助理嘅聽力障礙到底有幾嚴重，同埋會偷錄幾耐用家嘅對話，發現有語音助理一日可以誤啟 19 次，最長仲會偷錄 43 秒音效添！
今次呢個測試係由美國東北大學學者主導，首先佢哋搵嚟五部智能喇叭，包括 Google Home Mini、Apple HomePod、Harman Kardon Invoke by Microsoft、第二同三代 2 Amazon Echo Dot，佢哋各有唔同嘅啟動語音指令，例如 Apple HomePod 嘅 Hi Siri，Google Home 嘅 OK/Hey/Hi Google 等等。為咗令到測試公平公開公正，專家特登 setup 咗一個場景，用攝錄機記錄各部智能喇叭有無著燈啟燈，監察每部喇叭嘅數據傳輸狀況，以及錄低每部智能喇叭啟動後嘅反應。另外，佢哋亦準備咗多套美劇輪流播放，令智能喇叭聽到更多日常用語及多人口音。
結果發現，即使劇集內無出現各部智能喇叭嘅專屬啟動指令，全部喇叭都試過無端端啟動，不過視乎語音助手，有啲喇叭平均每日只係啟動 1.5 次，但亦有喇叭每日啟動 19 次之多，當中以 Apple Homepod 同 Harman Kardon 啟動得最多，聽落都幾令人討厭！不過，今次測試亦發現雖然呢啲喇叭會自動啟動，但就唔似有嚴重嘅竊聽行為發生，因為大部分喇叭只係啟動好短時間，大約 6 秒後就會熄機，只得 Echo Dot 同Harman Kardon 試過開著 20 至 43秒。
專家指出 Apple HomePod 之所以會誤著咁多次，可能同啟動指令有好大關係，只要劇集對話出現 Hi 或 Hey，然後接住母音為 S 嘅對白，Siri 就有好大機會彈出嚟。而 Google Home Mini 情況亦相若，只要出現 Hi 或 Hey 而跟隨住母音 為 G 嘅對白，一樣出事。睇嚟各大語音助理開發商，都要諗諗有乜方法提高辨析度，否則成日自動開機，好難唔令人聯想到有無偷錄嘅個人私隱㗎。
相關文章：【竊聽風暴】Google、Amazon智能喇叭偷錄密碼
