【勒索新招】Google AdSense、YouTube分紅危機！
以前寫過一排 blog，見都有少少人睇就諗吓點樣搵錢，咁啱嗰陣時有 Google AdSense 呢個服務，喺網頁留個位俾 Google 就有廣告派俾你，有人 click 就會收到少少分紅；當時年少無知，諗住搵幾部電腦每日撳幾吓廣告，一個月落嚟都有唔錯嘅收入……結果只係做咗幾日就俾 Google 發現，仲停埋我個戶口，直到今時今日都無成功賺過 Google AdSense 嘅錢。
我當然係反面教材啦，但係好多守法守規嘅企業，的確係靠 Google AdSense 搵到一萬幾千，幫補營運開支，遇着瀏覽量比較高嘅網站，分分鐘仲搵到多啲錢添！不過，如果唔好彩俾Google停咗個戶口，相信都幾頭痕。估唔到咁樣都會俾人鍊住 spring pocket，早前就有人向網絡安全公司 KrebsOnSecurity 報料，話收到恐嚇電郵，限佢72小時內交出面值 5000 美元嘅比特幣到指定戶口，唔係就搵人搞佢個 AdSense 戶口。
封電郵寫得好清楚，話佢哋熟晒 AdSense 點運作，如果當事人唔俾贖款，就會用機械程式喺唔同時段，不停咁撳當事人管理嘅 AdSense 廣告，令 Google 以為有「唔正常流量」而暫停個戶口，短期內更加唔會派廣告俾當事人，令收入直線下降。電郵仲話通常要等成個月之後，Google 先會解封戶口，到時佢哋就會以相同手法再做嘢，令 AdSense 永久終止當事人個戶口，以後都冇得靠AdSense賺錢，好毒！
KrebsOnSecurity 收到報料後，已經第一時間向 Google 查詢，不過Google就話唔評論個別事件，只係話佢哋有足夠工具同埋程序，處理「唔正常流量」嘅問題，而以往亦好少見到有類似形式嘅攻擊出現。另外 Google 又指設有網上支援中心，AdSense 用戶一發現有任何異常，可以即時報告，Google 就會監控住，唔會咁易俾人搞到喎！不過，到底會幾時回覆呢就大家心照啦，其實除咗 Google Adsense 有呢個問題，YouTube 上年推出嘅黃標政策，黑客亦可以用類似手法去 report，令 YouTuber 無晒收入，如果收到呢類勒索，真係俾又死唔俾又死㗎！
相關文章：【勒索新趨勢】唔俾錢 被竊資料網上大公開
