【網上任睇】MGM酒店千萬客人名單外洩
外國科技網站 ZDNet 收到料，喺一個黑客論壇見到一張拉斯維加斯 MGM Grand 酒店客人嘅清單，消息一出相當震撼，首先名單總共包含咗超過 1060 萬名客人嘅資料，有齊姓名、屋企地址、電話、電郵同埋出生日期，數量十分大，而最大鑊係有好多名人，包括歌星 Justin Bieber、Twitter 行政總裁 Jack Dorsey、多名記者，同埋來自美國國土安全部及運輸安全管理局嘅官員，仲要張名單出現咗喺一個公開嘅黑客論壇，而呢個論壇好多黑客都識去，如果張名單係真嘅都幾頭痕。
為咗驗證真假，ZDNet 就連同資安研究公司 Under the Brench 一齊試下聯絡名單中嘅客人，問下佢哋幾時住過 MGM，同埋核對下名單上嘅資料有幾真，點知認真不幸，張名單係堅嘅！雖然有部分電話已經打唔通，但依然有好多電話係真嘅，而且係聯絡到名單上嘅客人本人，唯一值得慶幸嘅係全部搵到嘅客人，都係 2017 年之前入住嘅，睇嚟黑客偷嘅並唔係最新嘅名單。
於是問下 MGM 有乜回應，結果酒店都好老實，話舊年八月的而且確俾人入侵過雲端伺服器，佢哋已經即時逐一通知客人，酒店方面強調張名單好多資料都係舊嘅，而且好肯定外洩嘅資料唔會有任何信用卡資料，而事後亦搵咗兩間資安公司嚟調查事故，並且加強網絡保安以防範同類事件再發生。
不過即使係咁，唔代表件事可以 close file，Under the Brench 負責人就話，就算冇信用卡資料，客人都有機會好長時間收到釣魚電郵，甚至俾人用 SIM swap 嚟奪取電話帳戶。STEALTHbits Technologies 市場總監Adam Laub 亦都話，即使件事過咗好耐，都仲會有客人受黑客騷擾，呢個就係點解每次發生呢類資料外洩事件，都會困擾受害企業同埋客人好長時間，所以企業真係、真係、真係要小心處理客人資料，尤其係放咗喺雲端伺服器嘅，唔單止要確保有足夠措施防止俾人入侵，最重要係幫所有資料加密，先可以將洩密機會減至最低。
相關文章：【別怪他】Forbes 財經網站失守 供應商漏洞燒埋身
