【手機鑑證實錄】火燒水浸無用 借晶還魂走唔甩
睇電影或電視情節，當罪犯就嚟俾警察追到，為咗消滅手機入面嘅罪證，罪犯會選擇將手機掟落水或火堆，破壞入面嘅電子零件，令執法人員無辦法喺入面取證。不過，美國 NIST 專家就話俾大家知，佢哋依然可以利用兩種方法，繞過受損部分去讀取餘下嘅數據㗎！
早前美國國家標準技術研究所（National Institute of Standards and Technology, NIST）嘅研究員 Rick Ayers 接受傳媒專訪，分享佢喺 NIST 入面做數碼取證嘅工作經驗。Rick 話佢已喺呢個部門做咗 17 年，見證住智能電話嘅進化。事實上，當年嘅電話功能有限，最多只係攞到啲短訊或幾張相，所以用作法庭取證嘅用途都唔大，反而當時嘅 PDA 例如 Palm、Windows 可以攞得多啲有用嘅證據。而隨住 iPhone 等智能電話嘅興起，由於大家都習慣用佢嚟收發即時訊息、電郵，上網或處理財務，所以手機內保存咗大量有用嘅證據，數碼取證就變得非常重要。而佢嘅日常日工作之一，就係測試吓點樣喺手機內電子零件入面修復數據，包括各品牌 Android 手機及 iPhone。
Rick 指出，好多人誤以為破壞咗手機，就會令入面嘅數據作廢，但其實只要用嚟儲存數據嘅部分未有被嚴重破壞，都有兩個方法可以攞返啲數據出嚟。首先第一個方法係 JTAG（Joint Task Action Group），專家利用業界生產線路底板嘅統一測試標準，將修復數據儀器焊接到底板上呢啲細如針頭嘅 port 位上，之後就可以讀取殘餘喺底板零件上嘅資料。不過，Rick 話呢個方法只可應用喺 Android 手機上，因為 iPhone 只得 Apple 生產，所以並唔存在乜嘢業界共用標準。
另一個方法就係拆除負責儲存數據嘅晶片出嚟，再讀取入面嘅資料。Rick 話傳統方法會直接掹粒晶片出嚟，不過有可能損壞接腳，影響可修復嘅數據量，所以而家會先拆出線路底板，慢慢打磨底板直至貼近晶片上嘅焊腳，咁就唔怕整斷啲腳啦。由於呢個過程比較複雜，所以 NIST 都係交出去俾專家做。所以話，真係要破壞手機入面嘅資料，真係要粉碎底板上嘅所有零件先得，但臨急臨忙又做唔做得切呢？
相關文章：【無計啦！】晶片先天缺陷 大條道理換新iPhone
